Gold Price Today : अमेरिका आणि इराण यांच्यात झालेल्या शांतता करारानंतर जागतिक पातळीवर सोने आणि चांदीच्या दरात मोठी घसरण होताना दिसत आहे. या घसरणीचा परिणाम भारतीय बाजारात देखील दिसून येत आहे.
भारतीय बाजारात सोन्याच्या दरात सलग दुसऱ्या दिवशी घसरण झाल्याने सोने खरेदी करणाऱ्यांना दिलासा मिळाला आहे. गुरुवारी मोठी घसरण झाल्यानंतर शुक्रवारीही सोन्याचे दर कमी झाले. मात्र, याउलट चांदीच्या किमतीत वाढ झाली आहे.
बाजारातील माहितीनुसार, 10 ग्रॅम सोन्याच्या दरात सुमारे 1,368 रुपयांची घट झाली आहे. त्यामुळे सोन्याचा सरासरी भाव आता सुमारे 1.46 लाख रुपयांवर आला आहे. दुसरीकडे, चांदीच्या दरात प्रति किलो सुमारे 3 हजार रुपयांपेक्षा अधिक वाढ झाली असून तिचा भाव 2.32 लाख रुपयांच्या आसपास पोहोचला आहे.
तज्ज्ञांच्या मते, लग्नसराईचा हंगाम संपल्याने सोन्याची मागणी कमी झाली आहे. तसेच अनेकजण जुने सोने विकत असल्याने बाजारात पुरवठा वाढला असून त्याचा परिणाम दरांवर झाला आहे. त्यामुळे सध्या सोने खरेदी करण्याचा विचार करणाऱ्यांसाठी ही चांगली संधी मानली जात आहे.
