ताज्या बातम्या

Bharat Gogawale : राज्यात पुन्हा एकदा ‘ऑपरेशन टायगर’? भरत गोगावले म्हणाले, “आता सांगत नाही, नाहीतर …

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Bharat Gogawale : महाराष्ट्राच्या राजकारणात पुन्हा एकदा ‘ऑपरेशन टायगर’ची चर्चा रंगली आहे. राज्याचे फलोत्पादन मंत्री भरत गोगावले यांनी सांगोल्यातील शिवसेना मेळाव्यात बोलताना राज्यात लवकरच आणखी एक ‘ऑपरेशन’ होणार असल्याचे संकेत दिले. मात्र, हे ऑपरेशन नेमके कोणत्या पक्षातील किंवा कोणत्या नेत्यांसंदर्भात आहे, याबाबत त्यांनी स्पष्ट माहिती देणे टाळले. सांगोला येथे माजी आमदार शहाजी बापू पाटील यांच्या पुढाकाराने शिवसेनेच्या मेळाव्याचे आयोजन करण्यात आले होते. यावेळी मंत्री भरत गोगावले, मंत्री योगेश कदम, दिपाली सय्यद यांच्यासह शिवसेनेचे पदाधिकारी आणि कार्यकर्ते उपस्थित होते. मेळाव्यात बोलताना भरत गोगावले यांनी “एकनाथ शिंदे ऑपरेशन टायगर करतात. ते कुणाला कळत नाही,” असे सांगितले. त्यानंतर राज्यात लवकरच आणखी एक ऑपरेशन होणार असल्याचे त्यांनी सूचक वक्तव्य केले. मात्र, या ऑपरेशनची माहिती आत्ताच जाहीर करण्यास त्यांनी नकार दिला. “लवकरच राज्यात दुसरे एक ऑपरेशन आहे. आता सांगत नाही, नाहीतर मीडिया बातम्या करेल,” असे म्हणत भरत गोगावले यांनी आपले वक्तव्य मध्येच थांबवले. त्यामुळे भरत गोगावले यांनी नेमके कोणत्या राजकीय घडामोडीचे संकेत दिले आहेत? राज्यात पुन्हा कोणते ‘ऑपरेशन टायगर’ होणार आहे? याबाबत राजकीय वर्तुळात चर्चेला उधाण आले आहे. तर दुसरीकडे काही दिवसांपूर्वी शिवसेना ठाकरे गटातील सहा खासदारांनी पक्षाची साथ सोडत एकनाथ शिंदे यांच्या शिवसेनेत प्रवेश केला होता.

Bharat Gogawale : राज्यात पुन्हा एकदा ‘ऑपरेशन टायगर’? भरत गोगावले म्हणाले, “आता सांगत नाही, नाहीतर … Read More »

Shahaji Bapu Patil : अशोक खरात प्रकरणावर शहाजी बापूंची फटकेबाजी; दिपाली सय्यद यांना थेट सवाल

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Shahaji Bapu Patil : अशोक खरातवर आधारित महाराष्ट्राची एल्फिन्स्टन फाईल या चित्रपटाच्या शूटिंगमध्ये सांगोल्यातील एका कथित पूजेचा प्रसंग समाविष्ट करण्यात आला आहे का? असा थेट सवाल माजी आमदार शहाजी बापू पाटील यांनी अभिनेत्री दिपाली सय्यद यांना केला. सांगोला येथे शिवसेनेच्या मेळाव्याचे आयोजन करण्यात आले होते. या मेळाव्याला मंत्री भरत गोगावले, मंत्री योगेश कदम आणि दिपाली सय्यद यांच्यासह शिवसेनेचे पदाधिकारी व कार्यकर्ते उपस्थित होते. यावेळी शहाजी बापू पाटील यांनी आपल्या खास शैलीत अशोक खरात वर टीका करत सांगोल्यात घडलेल्या कथित पूजेचा किस्सा सांगितला. शहाजी बापू पाटील यांच्या म्हणण्यानुसार, अशोक खरातने सांगोला तालुक्यात येऊन कथितरित्या उघड्या-नागड्या पद्धतीने धिंगाणा घालत पूजा केली होती. ही पूजा माझा भाचा अतुल पवार यांचा निवडणुकीत पराभव व्हावा आणि त्यांना जीवे मारण्याचा अनिष्ट प्रकार घडावा, या उद्देशाने करण्यात आल्याचा दावा त्यांनी केला. यावेळी शहाजी बापूंनी अतुल पवार यांना आपण दिलेला धीर सांगत, “तुझा मामा या महाराजाच्या बापाचा बाप आहे. तू मरत नाहीस, काळजी करू नको,” अशा आपल्या खास शैलीतील वक्तव्याचा उल्लेख केला. दरम्यान, अशोक खरात यांच्यावर आधारित चित्रपटाच्या शूटिंगमध्ये सांगोल्यातील या कथित पूजेचा प्रसंग दाखवण्यात आला आहे का, असा सवाल शहाजी बापूंनी दिपाली सय्यद यांना केला. या मुद्द्यावरून त्यांनी माजी आमदार दीपक साळुंखे यांनाही आपल्या खास शैलीत टोला लगावला. या संपूर्ण प्रकारावर शहाजी बापू पाटील यांनी केलेली फटकेबाजी मेळाव्यात चर्चेचा विषय ठरली.

Shahaji Bapu Patil : अशोक खरात प्रकरणावर शहाजी बापूंची फटकेबाजी; दिपाली सय्यद यांना थेट सवाल Read More »

Donald Trump : इराणच्या ‘पिकॅक्स माउंटन’वर लवकरच हल्ला? ट्रम्प यांचा थेट इशारा

Leave a Comment / ऑटोमोबाईल, ट्रेंडिंग, ताज्या बातम्या, हायलाईट / dnamarathi.com

Donald Trump : अमेरिकेचे राष्ट्राध्यक्ष डोनाल्ड ट्रम्प यांनी इराणच्या अणुकार्यक्रमाबाबत पुन्हा एकदा आक्रमक भूमिका घेतली आहे. इराणमधील अत्यंत सुरक्षित आणि भूमिगत ‘पिकॅक्स माउंटन’ अणुस्थळावर अमेरिका लवकरच हल्ला करू शकते, असा इशारा ट्रम्प यांनी दिला आहे. ओव्हल ऑफिसमध्ये पत्रकारांशी बोलताना ट्रम्प यांनी अमेरिकन लष्कर या ठिकाणाला “लवकरच” लक्ष्य करू शकते, असे संकेत दिले. इराणला अण्वस्त्र विकसित करण्यापासून रोखणे हा अमेरिकेच्या लष्करी कारवाईमागील प्रमुख उद्देश असल्याचेही त्यांनी स्पष्ट केले. पिकॅक्स माउंटन इतके महत्त्वाचे का? ‘पिकॅक्स माउंटन’ हे इराणमधील नतांझ अणुस्थळाजवळील डोंगराळ भागात असलेले अत्यंत मजबूत भूमिगत संकुल आहे. या ठिकाणी खोलवर बोगदे तयार करण्यात आले असून, त्यामुळे पारंपरिक हवाई हल्ल्यांपासून या परिसरातील सुविधा सुरक्षित राहू शकतात. अमेरिका आणि इस्रायली गुप्तचर यंत्रणांना संशय आहे की इराणने आपल्या अणुकार्यक्रमाशी संबंधित संवेदनशील उपकरणे किंवा सेंट्रीफ्यूज या भूमिगत ठिकाणी हलवले असावेत. मात्र, या ठिकाणी नेमके कोणते साहित्य किंवा उपकरणे आहेत, याबाबत पूर्णपणे स्वतंत्र पुष्टी झालेली नाही. संघर्ष आणखी चिघळण्याची शक्यता पिकॅक्स माउंटनवर अमेरिकेने प्रत्यक्ष हल्ला केल्यास अमेरिका-इराण संघर्ष आणखी तीव्र होण्याची शक्यता आहे. हे ठिकाण अत्यंत खोलवर असल्याने हल्ल्याचा परिणाम किती होईल, याबाबत लष्करी तज्ज्ञांमध्येही मतभेद आहेत. काही तज्ज्ञांच्या मते, हल्ल्यामुळे प्रवेशमार्ग बाधित होऊ शकतात मात्र भूमिगत मुख्य भाग पूर्णपणे नष्ट करणे आव्हानात्मक ठरू शकते. दरम्यान, इराणच्या अणुकार्यक्रमावरून अमेरिका आणि इराणमधील तणाव कायम असून, पिकॅक्स माउंटनवरील ट्रम्प यांचा ताजा इशारा या संघर्षातील पुढील मोठ्या लष्करी कारवाईचे संकेत मानला जात आहे.

Donald Trump : इराणच्या ‘पिकॅक्स माउंटन’वर लवकरच हल्ला? ट्रम्प यांचा थेट इशारा Read More »

vidyanand bapat attack dj noise pollution dna marathi

डीजेच्या आवाजाविरोधात भूमिका घेतल्याने विद्यानंद बापट यांच्यावर हल्ला; ध्वनीप्रदूषणाचा मुद्दा ऐरणीवर

Leave a Comment / क्राईम, ट्रेंडिंग, ताज्या बातम्या, हायलाईट / dnamarathi.com

अहमदनगर : डीजेच्या वाढत्या आवाजामुळे होणारे ध्वनीप्रदूषण आणि त्याचा नागरिकांच्या आरोग्यावर होणारा परिणाम याविरोधात भूमिका घेणाऱ्या विद्यानंद बापट यांच्यावर हल्ला झाल्याची घटना समोर आली आहे. या घटनेनंतर डीजेच्या कर्णकर्कश आवाजाचा प्रश्न पुन्हा एकदा चर्चेत आला असून, ध्वनीप्रदूषणाविरोधात आवाज उठविणाऱ्यांच्या सुरक्षिततेचाही प्रश्न उपस्थित झाला आहे. सण, उत्सव, धार्मिक कार्यक्रम तसेच विविध सार्वजनिक कार्यक्रमांमध्ये मोठ्या आवाजात डीजे व ध्वनिक्षेपक वाजविण्याचे प्रमाण गेल्या काही वर्षांत वाढले आहे. रात्री उशिरापर्यंत सुरू राहणाऱ्या या ध्वनिक्षेपकांमुळे परिसरातील नागरिकांना त्रास सहन करावा लागतो. विशेषतः ज्येष्ठ नागरिक, लहान मुले, विद्यार्थी तसेच रुग्णांना मोठ्या आवाजाचा त्रास होतो. याशिवाय ध्वनीप्रदूषणामुळे मानसिक तणाव, झोपेचा त्रास आणि श्रवणशक्तीवर परिणाम होण्याची शक्यता व्यक्त केली जाते. याच पार्श्वभूमीवर विद्यानंद बापट यांनी डीजेच्या आवाजाविरोधात भूमिका घेतली होती. सार्वजनिक ठिकाणी नियमांचे उल्लंघन करून मोठ्या आवाजात डीजे वाजविला जाऊ नये, अशी भूमिका त्यांनी मांडली. मात्र, या भूमिकेनंतर त्यांच्यावर हल्ला झाल्याने या प्रकरणाला वेगळे वळण मिळाले आहे. मतभेद असले तरी एखाद्या व्यक्तीने मांडलेल्या भूमिकेला उत्तर देताना हिंसाचाराचा मार्ग स्वीकारणे योग्य आहे का, असा सवाल या घटनेनंतर उपस्थित होत आहे. डीजे आणि ध्वनिक्षेपकांच्या आवाजासाठी प्रशासनाकडून विविध नियम आणि मर्यादा निश्चित करण्यात आलेल्या आहेत. सार्वजनिक शांतता आणि नागरिकांच्या आरोग्याचा विचार करून ध्वनीची पातळी नियंत्रित ठेवणे अपेक्षित आहे. मात्र, प्रत्यक्षात अनेक ठिकाणी या नियमांकडे दुर्लक्ष होत असल्याच्या तक्रारी नागरिकांकडून केल्या जातात. कार्यक्रमांच्या वेळी मोठ्या आवाजात संगीत सुरू असताना कारवाई करण्याची जबाबदारी कोणाची, तसेच नियमांचे उल्लंघन करणाऱ्यांवर प्रत्यक्षात किती कठोर कारवाई होते, याबाबतही प्रश्न उपस्थित केले जात आहेत. बापट यांच्यावरील हल्ल्याच्या घटनेमुळे केवळ एका व्यक्तीच्या सुरक्षिततेचा प्रश्न निर्माण झालेला नाही, तर ध्वनीप्रदूषणाविरोधात भूमिका घेणाऱ्या नागरिकांना आपले म्हणणे मांडण्याचे स्वातंत्र्य आहे का, हा व्यापक प्रश्नही समोर आला आहे. कायदा हातात न घेता तक्रारी आणि मतभेद कायदेशीर मार्गाने सोडविणे आवश्यक असल्याचे मत नागरिकांकडून व्यक्त होत आहे. दरम्यान, या हल्ल्याप्रकरणी संबंधित यंत्रणांनी निष्पक्ष चौकशी करून दोषींवर योग्य ती कारवाई करावी, अशी मागणी होत आहे. त्याचबरोबर डीजेच्या आवाजामुळे होणाऱ्या त्रासाबाबत प्रशासनाने नागरिकांच्या तक्रारींची गांभीर्याने दखल घेऊन ध्वनीप्रदूषणाच्या नियमांची प्रभावी अंमलबजावणी करावी, अशी अपेक्षाही व्यक्त केली जात आहे. बापट यांच्यावरील हल्ल्याच्या निमित्ताने डीजेच्या आवाजाचा प्रश्न पुन्हा एकदा ऐरणीवर आला आहे. उत्सव साजरे करण्याचा अधिकार आणि नागरिकांना शांततेत जगण्याचा अधिकार यांच्यात समतोल साधण्याचे आव्हान प्रशासनासमोर आहे.

डीजेच्या आवाजाविरोधात भूमिका घेतल्याने विद्यानंद बापट यांच्यावर हल्ला; ध्वनीप्रदूषणाचा मुद्दा ऐरणीवर Read More »

Sharad Pawar on Vidyanand Bapat : विद्यानंद बापटांवरील हल्ल्याचा शरद पवारांकडून निषेध; म्हणाले…

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Sharad Pawar on Vidyanand Bapat : गणेशोत्सवातील डीजे आणि कर्णकर्कश लाऊडस्पीकरच्या वापराला विरोध करणारे सामाजिक कार्यकर्ते विद्यानंद बापट यांच्यावर पुण्यात झालेल्या हल्ल्याच्या घटनेने मोठी खळबळ उडाली आहे. बापट हे माध्यमांशी बोलत असताना त्यांच्यावर हल्ला करण्यात आला. या घटनेनंतर राजकीय आणि सामाजिक क्षेत्रातून संतप्त प्रतिक्रिया उमटत असताना राष्ट्रवादी काँग्रेसचे अध्यक्ष शरद पवार यांनीही या प्रकरणावर भूमिका मांडली आहे. बापट यांच्याशी आपली वैयक्तिक ओळख नसली, तरी त्यांनी मांडलेल्या मुद्द्याशी आपण सहमत असल्याचे पवार यांनी स्पष्ट केले. बापटांवरील हल्ल्याचा शरद पवारांकडून निषेध विद्यानंद बापट यांच्यावर झालेल्या हल्ल्याचा निषेध करताना शरद पवार यांनी मतभिन्नता व्यक्त करण्यासाठी हिंसाचाराचा मार्ग स्वीकारणे योग्य नसल्याचे स्पष्ट केले. एखाद्या व्यक्तीची भूमिका आपल्याला मान्य नसली, तरी त्याला आपले मत मांडण्याचा अधिकार आहे. त्या मताला विरोध करायचा असेल तर तो वैचारिक आणि लोकशाही मार्गाने केला पाहिजे, अशी भूमिका पवार यांनी मांडली. बापट यांची भूमिका गणेशोत्सवाच्या विरोधात नसून उत्सवाच्या काळात होणाऱ्या ध्वनीप्रदूषणाच्या विरोधात असल्याचेही चर्चेत आले आहे. त्यामुळे त्यांच्या भूमिकेकडे त्याच संदर्भात पाहण्याची गरज असल्याचे पवार यांनी सूचित केले. ‘सण-उत्सव आनंदाचे असले पाहिजेत’ शरद पवार यांनी गणेशोत्सव आणि इतर सण-उत्सव हे समाजाला एकत्र आणणारे आणि आनंद देणारे असावेत, अशी भूमिका मांडली. मात्र मोठ्या आवाजातील डीजे आणि लाऊडस्पीकरमुळे ध्वनीप्रदूषणाचा प्रश्न निर्माण होत असेल, तर त्याकडे दुर्लक्ष करता येणार नाही. उत्सव साजरा करताना इतर नागरिकांनाही त्रास होणार नाही, याची काळजी घेणे आवश्यक आहे. उत्सवाचा आनंद घेताना ज्येष्ठ नागरिक, लहान मुले, विद्यार्थी, आजारी व्यक्ती आणि इतर नागरिकांच्या समस्यांचाही विचार झाला पाहिजे, असा या चर्चेचा मुख्य मुद्दा आहे. नेमकं प्रकरण काय? पुण्यातील विद्यानंद बापट हे गेल्या काही काळापासून सार्वजनिक उत्सवांमधील ध्वनीप्रदूषणाविरोधात भूमिका मांडत आहेत. विशेषतः गणेशोत्सवाच्या काळात डीजे आणि मोठ्या आवाजातील साउंड सिस्टीमच्या वापरावर निर्बंध असावेत, अशी त्यांची मागणी आहे. याच भूमिकेमुळे बापट चर्चेत आले होते. त्यांनी गणेशोत्सवातील डीजे आणि लाऊडस्पीकरच्या आवाजाबाबत प्रशासनाने नियमांची कठोर अंमलबजावणी करावी, अशी मागणी केली होती. गणेशोत्सवाला विरोध नसून ध्वनीप्रदूषणाला विरोध असल्याचे त्यांनी यापूर्वी स्पष्ट केले आहे. माध्यमांशी बोलत असतानाच हल्ला गुरुवारी पुण्यातील टिळक रोड परिसरात बापट एका वृत्तवाहिनीशी बोलत असताना त्यांच्यावर अचानक हल्ला करण्यात आला. हा प्रकार कॅमेऱ्यात कैद झाला आणि त्याचा व्हिडीओ सोशल मीडियावर मोठ्या प्रमाणात प्रसारित झाला. या घटनेनंतर पोलिसांनी संबंधित व्यक्तीला ताब्यात घेतले. पोलिसांकडून या प्रकरणाचा तपास सुरू असून हल्ल्यामागील नेमका हेतू आणि संबंधित व्यक्तीची पार्श्वभूमी तपासली जात आहे. हल्लेखोराची भूमिका काय? मिळालेल्या वृत्तांनुसार, हल्ल्याचा आरोप असलेल्या व्यक्तीने बापट यांच्या वक्तव्यांवर आक्षेप घेत त्यांच्यावर हल्ला केल्याचे सांगितले आहे. संबंधित व्यक्तीचा गणेश मंडळाशी संबंध असल्याचेही वृत्तांत नमूद करण्यात आले आहे. मात्र एखाद्याच्या वक्तव्याशी किंवा भूमिकेशी असहमती असली तरी त्यासाठी मारहाण करणे किंवा कायदा हातात घेणे योग्य ठरू शकत नाही. या घटनेमुळे गणेशोत्सवाच्या पार्श्वभूमीवर डीजे, ध्वनीप्रदूषण आणि अभिव्यक्तिस्वातंत्र्य या तिन्ही मुद्द्यांवर पुन्हा चर्चा सुरू झाली आहे.

Sharad Pawar on Vidyanand Bapat : विद्यानंद बापटांवरील हल्ल्याचा शरद पवारांकडून निषेध; म्हणाले… Read More »

Delhi Crime : 5 कोटींची खंडणी, दीड कोटी दिले तरी जीव गेला; जिमबाहेर प्रॉपर्टी डीलरवर गोळीबार

Leave a Comment / क्राईम, ट्रेंडिंग, ताज्या बातम्या / dnamarathi.com

Delhi Crime : राजधानी दिल्लीतील नरेला परिसरात खंडणीच्या पार्श्वभूमीवर प्रॉपर्टी डीलरची गोळ्या झाडून हत्या करण्यात आल्याने खळबळ उडाली आहे. प्रमोद कुमार असे मृत प्रॉपर्टी डीलरचे नाव असल्याचे समोर आले आहे. धक्कादायक बाब म्हणजे, आरोपींनी यापूर्वी त्यांच्याकडे तब्बल 5 कोटी रुपयांची खंडणी मागितली होती आणि त्यापैकी सुमारे 1.5 कोटी रुपये दिल्याचे पोलिस सूत्रांच्या हवाल्याने सांगितले जात आहे. पैसे दिल्यानंतरही खंडणीखोरांकडून त्रास सुरूच राहिला आणि अखेर त्यांच्यावर जीवघेणा हल्ला करण्यात आला. जिमबाहेर दबा धरून बसलेल्या हल्लेखोरांचा गोळीबार मिळालेल्या माहितीनुसार, प्रमोद कुमार जिममध्ये गेले होते. जिममधून बाहेर आल्यानंतर ते बुलेटप्रूफ कारमधून उतरत असतानाच हल्लेखोरांनी त्यांच्यावर अंदाधुंद गोळीबार केला. या हल्ल्यात त्यांना अनेक गोळ्या लागल्या. वृत्तानुसार, हल्लेखोरांनी सुमारे 16 गोळ्या झाडल्या. गंभीर जखमी झालेल्या प्रमोद कुमार यांचा मृत्यू झाला. त्यांच्यासोबत असलेल्या मित्राने मात्र घटनास्थळावरून पळ काढत आपला जीव वाचवला. घटनेनंतर परिसरात मोठी खळबळ उडाली आणि पोलिसांनी तपास सुरू केला. 2024 मध्ये मागितली होती 5 कोटींची खंडणी पोलिस सूत्रांच्या माहितीनुसार, प्रमोद कुमार यांच्याकडे 2024 मध्ये सुमारे 5 कोटी रुपयांची खंडणी मागण्यात आली होती. या दबावाखाली त्यांनी सुमारे 1.5 कोटी रुपये दिल्याचे सांगितले जात आहे. मात्र एवढी मोठी रक्कम दिल्यानंतरही खंडणीखोर थांबले नाहीत. यानंतर पुन्हा पैशांची मागणी आणि धमक्या सुरू झाल्याची माहिती समोर आली आहे. त्यामुळे प्रमोद कुमार यांच्या सुरक्षेचा प्रश्न गंभीर बनला होता. सुरक्षेसाठी बुलेटप्रूफ कारचा वापर धमक्या वाढल्यानंतर प्रमोद कुमार यांनी सुरक्षेसाठी बुलेटप्रूफ वाहनाचा वापर सुरू केला होता. अलीकडेच त्यांनी डिफेंडर गाडी घेतल्याचेही वृत्त आहे. त्यानंतर धोका लक्षात घेऊन ते एका मित्राच्या बुलेटप्रूफ कारमधून प्रवास करत असल्याचे पोलिस सूत्रांनी सांगितले. मात्र हल्लेखोरांनी त्यांच्या हालचालींवर लक्ष ठेवून जिमबाहेरच त्यांच्यावर हल्ला केल्याचे प्राथमिक तपासातून समोर येत आहे. त्यामुळे बुलेटप्रूफ वाहनातून मिळणारी सुरक्षा असूनही हल्लेखोरांनी नेमका संधीचा फायदा घेतल्याचे दिसते. सोशल मीडियावर धमकीची जबाबदारी? या हत्येनंतर एका कथित सोशल मीडिया पोस्टमुळे तपासाला नवा वळण मिळाले आहे. पोस्टमध्ये प्रमोद कुमार यांना यापूर्वी फोन केल्याचा उल्लेख असून, परवाना असलेले शस्त्र किंवा सुरक्षा त्यांना वाचवू शकणार नाही, अशा आशयाची धमकी देण्यात आल्याचे वृत्त आहे. या पोस्टमध्ये पैसे न दिल्यास परिणाम भोगावे लागतील आणि फोन करून विसरत नसल्याचा इशाराही देण्यात आल्याचे वृत्त आहे. ही पोस्ट नेमकी कोणी केली आणि तिचा हत्येशी थेट संबंध आहे का, याचा पोलिस तपास करत आहेत. हिमांशु-नीरज फरीदपुर गँगचा संशय या प्रकरणात हिमांशु-नीरज फरीदपुर गँगने हत्येची जबाबदारी स्वीकारल्याचा दावा काही वृत्तांत करण्यात आला आहे. मात्र या दाव्याची स्वतंत्र अधिकृत पुष्टी होणे आणि हल्ल्यामागील सर्व आरोपींची भूमिका स्पष्ट होणे बाकी आहे. पोलिसांकडून हल्लेखोरांची ओळख, त्यांचे साथीदार, वापरलेली वाहने आणि हत्येचा कट नेमका कुठे व कसा रचण्यात आला, याचा तपास सुरू आहे. खंडणी दिल्यानंतरही जीव वाचला नाही या संपूर्ण घटनेतील सर्वात धक्कादायक बाब म्हणजे, कथितरित्या 1.5 कोटी रुपये दिल्यानंतरही प्रमोद कुमार यांना खंडणीच्या धमक्यांपासून मुक्तता मिळाली नाही. उलट त्यांच्यावर पुन्हा दबाव वाढला आणि अखेर त्यांची हत्या झाली. या घटनेमुळे दिल्ली-एनसीआरमध्ये प्रॉपर्टी व्यवसायिकांकडून खंडणी वसुली आणि गुन्हेगारी टोळ्यांच्या वाढत्या दहशतीचा मुद्दा पुन्हा ऐरणीवर आला आहे. प्रमोद कुमार यांच्या हत्येचा तपास करताना पोलिस अनेक बाजूंनी चौकशी करत आहेत. यामध्ये पूर्वी करण्यात आलेल्या खंडणीच्या मागण्या, पैसे दिल्याचा दावा, अलीकडील धमक्या, सोशल मीडिया पोस्ट, जिमबाहेरील सीसीटीव्ही फुटेज आणि हल्लेखोरांचा मार्ग यांचा समावेश आहे. हल्लेखोरांनी जिमबाहेर नेमकी किती वेळ रेकी केली होती, त्यांना प्रमोद कुमार यांच्या येण्याची माहिती कशी मिळाली आणि या कटामध्ये आणखी कोणाचा सहभाग होता, याचा शोध घेणे तपासासाठी महत्त्वाचे ठरणार आहे. दरम्यान, या प्रकरणात पोलिसांकडून आरोपींचा शोध सुरू असून, हत्येमागील संपूर्ण कट आणि खंडणी प्रकरणाचा तपशील तपास पूर्ण झाल्यानंतर अधिक स्पष्ट होण्याची शक्यता आहे.

Delhi Crime : 5 कोटींची खंडणी, दीड कोटी दिले तरी जीव गेला; जिमबाहेर प्रॉपर्टी डीलरवर गोळीबार Read More »

Property Rules : मालमत्ता खरेदी नोंदणी प्रक्रियेत खरेदीदाराला मराठी भाषा सक्ती करा; मराठी एकीकरण समितीची मागणी

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Property Rules : महाराष्ट्र राज्यात मालमत्ता खरेदी-विक्री नोंदणी प्रक्रियेत मराठी भाषेचा सक्तीने वापर करण्यात यावा, अशी ठाम मागणी मराठी एकीकरण समितीने महसूल मंत्र्यांकडे केली आहे. यासंदर्भात समितीने सविस्तर निवेदन सादर केले असून, राज्यातील सर्व शासकीय कामकाजात मराठीचा वापर बंधनकारक असल्याचे अधोरेखित केले आहे. समितीच्या मते, भारत सरकारच्या संकेतस्थळावरील तरतुदीनुसार (India Code) महाराष्ट्रात मराठी ही राजभाषा असून शासकीय व्यवहार मराठीतच होणे अपेक्षित आहे. मात्र प्रत्यक्षात महसूल विभागांतर्गत नोंदणी कार्यालयांमध्ये मालमत्ता व्यवहार करताना मराठीचा पुरेसा वापर होत नसल्याचे निदर्शनास आले आहे. यामुळे सामान्य नागरिकांना अडचणींचा सामना करावा लागत असून, राजभाषा धोरणाच्या अंमलबजावणीसही बाधा येत आहे. समितीच्या प्रमुख मागण्या पुढीलप्रमाणे आहेत: राज्यातील सर्व निबंधक व उपनिबंधक कार्यालयांमध्ये व्यवहार करताना मराठीत संवाद साधणे अनिवार्य करावे. मराठी भाषा न समजणाऱ्या व्यक्तींकरिता स्पष्ट धोरण आखून, अधिकृत भाषांतर किंवा सहाय्य व्यवस्था उपलब्ध करून द्यावी. मालमत्ता नोंदणी प्रक्रियेत सर्व कागदपत्रे, व्यवहार व संवाद शक्यतो मराठीतच करण्यास बंधनकारक करावे. शासकीय कामकाजात मराठीऐवजी इतर भाषांचा वापर करणाऱ्या अधिकारी-कर्मचाऱ्यांवर राजभाषा नियमांनुसार कारवाई करावी. “मराठीत व्यवहार करा” या संदर्भातील मार्गदर्शक सूचना सर्व नोंदणी कार्यालयांमध्ये जाहीर कराव्यात. समितीने स्पष्ट केले की, मराठी ही राज्याची ओळख असून सर्वसामान्य नागरिकांची संवादभाषा आहे. त्यामुळे प्रत्येक शासकीय व्यवहारात तिचा प्रभावी वापर होणे अत्यावश्यक आहे. यासाठी शासनाने ठोस पावले उचलून सर्वांसाठी सुलभ आणि पारदर्शक प्रशासन व्यवस्था निर्माण करावी, अशी मागणी करण्यात आली आहे. समितीने महसूल मंत्र्यांना या बाबीकडे गांभीर्याने लक्ष देऊन आवश्यक ती तातडीची कार्यवाही करण्याचे आवाहन केले आहे.

Property Rules : मालमत्ता खरेदी नोंदणी प्रक्रियेत खरेदीदाराला मराठी भाषा सक्ती करा; मराठी एकीकरण समितीची मागणी Read More »

Chandrakant Patil : कोथरूडमध्ये मंत्री चंद्रकांत पाटील यांच्याबाबत आक्षेपार्ह मजकूर प्रसारित केल्याप्रकरणी गुन्हा

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Chandrakant Patil : महाराष्ट्राचे मंत्री चंद्रकांत पाटील यांच्याबाबत सोशल मीडियावर आक्षेपार्ह आणि बदनामीकारक मजकूर तसेच व्हिडिओ प्रसारित केल्याप्रकरणी कोथरूड पोलीस ठाण्यात गुन्हा दाखल करण्यात आला आहे. याप्रकरणी संतोष पंडित यांच्याविरोधात तक्रार दाखल करण्यात आली असून, सारिका कांबळे यांनी पोलिसांकडे फिर्याद दिली आहे. पोलिसांकडील तक्रारीनुसार, संबंधित व्यक्तीने ‘संतोष पंडित 6278’ या यूट्यूब अकाउंटवरून मंत्री चंद्रकांत पाटील तसेच मिताली साळवेकर यांच्याबाबत आक्षेपार्ह स्वरूपाचा मजकूर आणि व्हिडिओ प्रसारित केल्याचा आरोप आहे. संबंधित पोस्ट आणि व्हिडिओमुळे बदनामी झाल्याचे तक्रारीत नमूद करण्यात आले आहे. तसेच, संबंधित पोस्ट आणि व्हिडिओला मोठ्या प्रमाणावर व्ह्यूज मिळाल्याचेही तक्रारीत नमूद करण्यात आले आहे. या प्रकरणी कोथरूड पोलीस ठाण्यात गुन्हा क्रमांक 0361/2026 नोंद करण्यात आला आहे. पोलिसांनी भारतीय न्याय संहिता कलम 75(1)(iv), 75(3), 356(2), 352 तसेच माहिती तंत्रज्ञान अधिनियमातील कलम 67 अंतर्गत गुन्हा दाखल केला आहे. 3 सप्टेंबर 2026 रोजी पहाटे 1 वाजून 28 मिनिटांनी या गुन्ह्याची नोंद करण्यात आली. या प्रकरणाचा तपास पोलीस निरीक्षक अनिल शिवाजी माने यांच्याकडे सोपविण्यात आला असून, पुढील तपास कोथरूड पोलीस करत आहेत.

Chandrakant Patil : कोथरूडमध्ये मंत्री चंद्रकांत पाटील यांच्याबाबत आक्षेपार्ह मजकूर प्रसारित केल्याप्रकरणी गुन्हा Read More »

ahilyanagar municipal corporation election

Ahilyanagar News : महापालिका रुग्णालयाच्या आरक्षणावर खासगी हॉस्पिटलची परवानगी शासनाच्या रडारवर

Leave a Comment / ऑटोमोबाईल, ट्रेंडिंग, ताज्या बातम्या, हायलाईट / dnamarathi.com

Ahilyanagar News : सावेडीतील महापालिका रुग्णालयासाठी विकास आराखड्यात आरक्षित असलेल्या जागेवर खासगी रुग्णालयाला विकास व बांधकाम परवानगी देण्यात आल्याचे प्रकरण आता नगरविकास विभागाच्या वरिष्ठ स्तरावरील परीक्षणाखाली आले आहे. सामाजिक कार्यकर्ते शेख शाकीर यांनी प्रधान सचिवांकडे केलेल्या पाठपुराव्यानंतर शासनाने नगररचना संचालकांसह संबंधित वरिष्ठ कार्यालयांकडून स्वयंस्पष्ट अभिप्राय, सविस्तर अहवाल आणि विकास योजनेचा भाग नकाशा मागविला आहे. मौजे सावेडी येथील सर्वे नं. 9/2/1B/2 व सर्वे नं. 12/4/12/5B मधील जागा विकास आराखड्यात ‘EP-43 Municipal Hospital Reservation’ म्हणून महापालिका रुग्णालयासाठी आरक्षित आहे. मात्र, याच जागेवर खासगी रुग्णालयासाठी भूखंड एकत्रीकरण, विकास परवानगी व बांधकाम परवानगीची प्रक्रिया करण्यात आल्याचा आक्षेप आहे. सावेडी परिसरात मोठ्या प्रमाणावर नागरी वस्ती वाढलेली असून सार्वजनिक रुग्णालयाची गरज दिवसेंदिवस वाढत आहे. अशा परिस्थितीत महापालिका रुग्णालयासाठी आरक्षित जागेवर खासगी रुग्णालयाला परवानगी दिल्याने भविष्यात महापालिकेचे स्वतःचे रुग्णालय उभारण्याच्या मूळ उद्देशालाच अडथळा निर्माण होऊ शकतो, असा मुद्दा शासनाकडे मांडण्यात आला आहे. या परवानगी प्रक्रियेत महानगरपालिकेत शासनाकडून नियुक्त तत्कालीन सहाय्यक संचालक नगररचना श्रीमती स्नेहल यादव यांचा अभिप्राय व मान्यता न घेताच प्रस्ताव पुढे नेण्यात आल्याचा आरोप आहे. तसेच संबंधित रुग्णालयासाठी संचालक, महाराष्ट्र अग्निशमन सेवा यांच्याकडून आवश्यक Fire NOC न घेता महापालिकेच्या अग्निशमन अधीक्षकांची NOC ग्राह्य धरून पुढील परवानगी देण्यात आल्याची बाबही शासनाच्या निदर्शनास आणून देण्यात आली आहे. या प्रकरणी शेख यांनी लाचलुचपत प्रतिबंधक विभागाकडे स्वतंत्र तक्रार केली होती. त्यानंतर अपर पोलीस अधीक्षक, लाचलुचपत प्रतिबंधक विभाग यांनी 22 जुलै 2026 रोजी प्रधान सचिव, नगरविकास विभाग यांना पत्र पाठवून, भ्रष्टाचाराच्या अनुषंगाने चौकशी आवश्यक असल्यास विभागाला प्राधिकृत करण्याची विनंती केली होती. मात्र, नगरविकास विभागाने 31 जुलै 2026 रोजी हे प्रकरण तपासणी व नियमानुसार कार्यवाहीसाठी पुन्हा अहिल्यानगर महानगरपालिका आयुक्तांकडे पाठविल्याने शेख यांनी प्रधान सचिवांकडे लेखी आक्षेप घेतला. “ज्या प्रशासनाच्या परवानगी प्रक्रियेची तक्रार आहे, त्याच प्रशासनाकडे चौकशी देणे निष्पक्ष चौकशीच्या तत्त्वाशी विसंगत आहे,” असा मुद्दा त्यांनी उपस्थित केला. या आक्षेपानंतर शासनाने प्रकरणाची व्याप्ती वाढवत आयुक्त मनापा. संचालक नगररचना, ; सहसंचालक, नगररचना, सहाय्यक संचालक, नगररचना, यांच्याकडून अहवाल व अभिप्राय मागविला आहे. शासनास सादर होणाऱ्या अहवालात EP-43 चे महापालिका रुग्णालय आरक्षण अस्तित्वात असताना खासगी रुग्णालयाला परवानगी कोणत्या आधारावर देण्यात आली, आरक्षण बदल अथवा रद्द करण्याचा सक्षम आदेश आहे का, शासन नियुक्त नगररचना अधिकाऱ्याची मान्यता का घेण्यात आली नाही आणि महाराष्ट्र अग्निशमन सेवा संचालकांची NOC नसताना महापालिकेची NOC कोणत्या अधिकारात ग्राह्य धरण्यात आली, या बाबींवर खुलासा अपेक्षित आहे. अहिल्यानगर महानगरपालिकेचे नगररचनाकार वैभव जोशी आणि आयुक्त यशवंत डांगे यांच्या प्रशासकीय कार्यकाळात ही परवानगी प्रक्रिया झाल्याने संबंधित निर्णयांची स्वतंत्र व वरिष्ठ स्तरावर चौकशी करून जबाबदारी निश्चित करण्याची मागणी करण्यात आली आहे. त्यामुळे सावेडीतील EP-43 प्रकरण आता केवळ एका बांधकाम परवानगीपुरते मर्यादित राहिले नसून सार्वजनिक आरोग्यासाठी राखीव जमीन, नगररचना प्रक्रियेची वैधानिकता, अग्निसुरक्षा मंजुरी आणि प्रशासकीय जबाबदारी या सर्वच मुद्द्यांवर शासनाच्या परीक्षणाखाली आले आहे.

Ahilyanagar News : महापालिका रुग्णालयाच्या आरक्षणावर खासगी हॉस्पिटलची परवानगी शासनाच्या रडारवर Read More »

Nikki Tamboli : निक्की तांबोळी-अरबाज पटेलचं ‘फेक ब्रेकअप’! ट्रोलिंगनंतर निक्कीचा संताप, म्हणाली- ‘बहती गंगा में सबने हाथ धोया, पण…’

Leave a Comment / ट्रेंडिंग, ताज्या बातम्या, मनोरंजन, हायलाईट / dnamarathi.com

Nikki Tamboli : ‘बिग बॉस मराठी 5’मधून चर्चेत आलेली अभिनेत्री निक्की तांबोळी आणि अरबाज पटेल पुन्हा एकदा सोशल मीडियावर चर्चेत आहे. काही दिवसांपूर्वी दोघांनी सोशल मीडियावर एकमेकांपासून दुरावल्याचे संकेत दिले होते. एकमेकांना अनफॉलो करणे, भावनिक पोस्ट आणि फसवणुकीशी संबंधित संकेत यामुळे दोघांचं नातं संपल्याच्या चर्चांना उधाण आलं होतं. मात्र, आता या संपूर्ण ‘ब्रेकअप’मागचं कारण समोर आलं असून, हे सगळं त्यांच्या नव्या म्युझिक व्हिडिओच्या प्रमोशनसाठी केलेलं पीआर होता. या खुलाशानंतर निक्की आणि अरबाजला सोशल मीडियावर मोठ्या प्रमाणात ट्रोल केलं जात आहे. चाहत्यांची दिशाभूल केल्याचा आरोप होत असतानाच निक्की तांबोळीने आता ट्रोलर्सना थेट प्रत्युत्तर दिलं आहे. सोशल मीडिया स्टोरीच्या माध्यमातून तिने आपली नाराजी व्यक्त करत, या संपूर्ण प्रकाराकडे ‘मार्केटिंग’ म्हणून पाहण्याचं आवाहन केलं आहे. नेमकं काय झालं होतं? निक्की तांबोळी आणि अरबाज पटेल यांची जवळीक ‘बिग बॉस मराठी 5’च्या घरात वाढली होती. शोदरम्यान दोघांमध्ये प्रेमसंबंध निर्माण झाले आणि शो संपल्यानंतरही त्यांचं नातं कायम असल्याचं दिसून आलं. दोघेही अनेकदा एकत्र दिसत होते आणि सोशल मीडियावरही एकमेकांसोबतचे फोटो व व्हिडिओ शेअर करत होते. अलीकडे मात्र अचानक दोघांनी एकमेकांना सोशल मीडियावर अनफॉलो केलं. त्यानंतर अरबाजने विश्वासघात आणि ‘चीटिंग’शी संबंधित एक भावनिक पोस्ट शेअर केली. या पोस्टचा रोख निक्कीकडे असल्याचा अंदाज चाहत्यांनी लावला. निक्कीनेही त्यानंतर एक गूढ पोस्ट केल्याने ब्रेकअपच्या चर्चांना आणखी हवा मिळाली. मात्र, त्या वेळी दोघांनी अधिकृतपणे ब्रेकअप झाल्याचं स्पष्ट केलं नव्हतं. सोशल मीडियावरील पोस्ट आणि दोघांच्या वागण्यात झालेला बदल पाहून अनेक चाहत्यांनी हे नातं तुटल्याचं गृहीत धरलं. काही चाहत्यांनी निक्कीला ट्रोल करण्यास सुरुवात केली, तर काहींनी अरबाजच्या पोस्टवर प्रतिक्रिया देत त्याला पाठिंबा दिला. निक्कीने स्वतःला ‘सिंगल’ संबोधल्याची चर्चा आणि तिच्या भावनिक पोस्टमुळेही या प्रकरणाला अधिक रंग चढला होता. त्यामुळे हे प्रकरण केवळ सोशल मीडिया चर्चेपुरतं राहिलं नाही, तर मनोरंजन विश्वातही त्याची मोठी चर्चा झाली. अखेर समोर आलं ‘फेक ब्रेकअप’चं सत्य मात्र, म्युझिक व्हिडिओ रिलीज झाल्यानंतर या संपूर्ण प्रकरणामागील कारण स्पष्ट झालं. निक्की आणि अरबाज यांचा नवीन म्युझिक व्हिडिओ प्रदर्शित झाला असून, त्याच्या प्रमोशनसाठी दोघांनी ब्रेकअपचा सीन तयार केल्याचं समोर आलं. निक्कीने सांगितलं की, हे सगळं निर्मात्यांच्या प्लॅनचा भाग होतं. कलाकार म्हणून त्यांना जे सांगितलं जातं, त्यानुसार काम करावं लागतं. मात्र, सोशल मीडियावरील लोकांनी आणि चाहत्यांनी हे ब्रेकअप खरं मानलं. इतकंच नाही तर त्यांच्याकडे या विषयावर फोनही येऊ लागले होते, असं निक्कीने सांगितलं. ट्रोलिंगनंतर निक्कीचा पारा चढला फेक ब्रेकअपचा खुलासा झाल्यानंतर मात्र दोघांवर मोठ्या प्रमाणात टीका झाली. चाहत्यांना भावनिक केल्याचा आणि प्रसिद्धीसाठी नात्याचा वापर केल्याचा आरोप सोशल मीडियावर करण्यात आला. या ट्रोलिंगनंतर निक्कीने आपल्या इन्स्टाग्राम स्टोरीवर एक व्हिडिओ आणि त्यासोबत एक नोट शेअर केली. ट्रोलर्सना उद्देशून तिने अतिशय आक्रमक शब्दांत आपली भूमिका मांडली. निक्कीच्या म्हणण्यानुसार, लोकांनी या संपूर्ण प्रकरणावर रील्स बनवल्या, कथा तयार केल्या आणि त्यातून कंटेंट तयार केला. पण तिने मात्र याच चर्चेचा उपयोग स्वतःच्या गाण्याच्या प्रमोशनसाठी केला. ‘बहती गंगा में सबने हाथ धोया, पण ती गंगा मी तयार केली,’ अशा आशयाची प्रतिक्रिया देत तिने हा सगळा प्रकार मार्केटिंगचा भाग असल्याचं स्पष्ट केलं. ‘हीच तर मार्केटिंग आहे’, निक्कीचा दावा निक्कीने आपल्या पोस्टमधून स्पष्ट करण्याचा प्रयत्न केला की, सोशल मीडियावर निर्माण झालेल्या चर्चेचा फायदा तिच्या गाण्याला झाला. लोकांनी या कथित ब्रेकअपवर चर्चा केली, रील्स बनवल्या आणि वेगवेगळ्या प्रकारचा कंटेंट तयार केला. त्यामुळे म्युझिक व्हिडिओकडे मोठ्या प्रमाणात लक्ष वेधलं गेलं. निक्कीने हा प्रकार ‘मार्केटिंग’ असल्याचं सांगत, ट्रोलिंगलाही अप्रत्यक्षपणे आपल्या प्रमोशनचा भाग ठरवलं. दोन वर्षांपासून चर्चेत आहे निक्की-अरबाजचं नातं निक्की आणि अरबाज यांचं नातं ‘बिग बॉस मराठी 5’पासून चर्चेत आहे. रिअॅलिटी शोमध्ये दोघांची जवळीक वाढली आणि त्यानंतरही त्यांचं नातं कायम राहिलं. दोघे ‘द 50’ या शोमध्येही एकत्र दिसले. या शोदरम्यान अरबाजने निक्कीला लग्नासाठी प्रपोज केल्याचंही समोर आलं होतं. निक्कीनेही अरबाजसाठी आपल्या कुटुंबाच्या विरोधात जाण्याची तयारी केल्याचं सांगितलं होतं. त्यामुळे त्यांच्या नात्याबद्दल चाहत्यांमध्येही मोठी उत्सुकता होती. मग खरंच ब्रेकअप झालंय का? या सगळ्या प्रकारानंतर सर्वात मोठा प्रश्न हा आहे की निक्की आणि अरबाज खरंच वेगळे झाले आहेत की हा पूर्णपणे प्रमोशनल स्टंट होता? सध्या उपलब्ध माहितीनुसार, दोघांनी ज्या पद्धतीने ब्रेकअपचं वातावरण तयार केलं होतं, त्याचा संबंध त्यांच्या नवीन म्युझिक व्हिडिओच्या प्रमोशनशी असल्याचं स्पष्ट झालं आहे. मात्र, त्यांच्या वैयक्तिक नात्याची सद्यस्थिती याबाबत दोघांकडून स्वतंत्र आणि सविस्तर अधिकृत स्पष्टीकरण समोर आलेलं नाही.

Nikki Tamboli : निक्की तांबोळी-अरबाज पटेलचं ‘फेक ब्रेकअप’! ट्रोलिंगनंतर निक्कीचा संताप, म्हणाली- ‘बहती गंगा में सबने हाथ धोया, पण…’ Read More »