ताज्या बातम्या

Rahul Gandhi: राहुल गांधी, प्रियंका गांधींसह विरोधी नेत्यांवर FIR; कारण काय?

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Rahul Gandhi : काँग्रेस नेते आणि लोकसभेतील विरोधी पक्षनेते राहुल गांधी तसेच काँग्रेस खासदार प्रियंका गांधी वाड्रा यांच्यासह इंडिया आघाडीतील काही विरोधी नेत्यांविरोधात दिल्ली पोलिसांनी गुन्हा दाखल केला आहे. निवडणूक आयोगाच्या विरोधात काढण्यात आलेल्या मोर्चादरम्यान आकाशवाणी भवनाच्या परिसरात परवानगीशिवाय प्रवेश करून आंदोलन केल्याचा आरोप त्यांच्यावर करण्यात आला आहे. ही घटना 6 ऑक्टोबर रोजी घडली. मतदार यादीच्या विशेष सखोल पुनरावलोकनाच्या (SIR) मुद्द्यावरून तसेच मुख्य निवडणूक आयुक्त ज्ञानेश कुमार यांच्या विरोधात इंडिया आघाडीच्या खासदारांनी दिल्लीत आंदोलन केले होते. आंदोलनादरम्यान पोलिसांनी मोर्चा अडवल्यानंतर परिस्थिती अधिक तीव्र झाली आणि काही विरोधी नेते आकाशवाणी भवनाच्या परिसरात पोहोचले. निवडणूक आयोगाच्या दिशेने मोर्चा राहुल गांधी यांच्या नेतृत्वाखाली विरोधी पक्षांच्या खासदारांनी संसद परिसरातून निवडणूक आयोगाच्या कार्यालयाच्या दिशेने मोर्चा काढला होता. या आंदोलनात काँग्रेससह इंडिया आघाडीतील इतर पक्षांचे नेतेही सहभागी झाले होते. विरोधकांकडून मतदार याद्यांमधील कथित अनियमितता आणि SIR प्रक्रियेवर प्रश्न उपस्थित करण्यात येत आहेत. तसेच मुख्य निवडणूक आयुक्त ज्ञानेश कुमार यांच्या राजीनाम्याची मागणीही करण्यात आली. पोलिसांनी मोर्चाचा मार्ग अडवल्यानंतर अनेक खासदारांना ताब्यात घेण्यात आले. मात्र राहुल गांधी, प्रियंका गांधी आणि काही अन्य नेते आंदोलनस्थळी राहिले. आकाशवाणी भवन परिसरात आंदोलन पोलिसांकडून अडवण्यात आल्यानंतर राहुल गांधी आणि प्रियंका गांधी यांच्यासह काही विरोधी नेते आकाशवाणी भवनाच्या परिसरात पोहोचले. त्यानंतर त्यांनी परिसरातच आंदोलन सुरू केले. वृत्तांनुसार, राहुल गांधी आणि प्रियंका गांधी बराच वेळ आकाशवाणी भवन परिसरात एका झाडाखाली बसून आंदोलन करत होते. त्यांच्यासोबत काँग्रेसचे काही अन्य खासदारही उपस्थित होते. हे आंदोलन सुमारे आठ तासांहून अधिक काळ सुरू राहिले. आकाशवाणीच्या तक्रारीनंतर कारवाई आकाशवाणी भवन प्रशासनाच्या तक्रारीनंतर दिल्ली पोलिसांनी या प्रकरणात कारवाई केली. तक्रारीत राहुल गांधी, प्रियंका गांधी यांच्यासह काही खासदार आणि इतर व्यक्तींनी परवानगीशिवाय परिसरात प्रवेश केल्याचा आरोप करण्यात आला आहे. तक्रारीनंतर पोलिसांनी प्रकरणाची नोंद केली असून, आंदोलनादरम्यान नेमकी परिस्थिती काय होती आणि कोणाची काय भूमिका होती, याचा तपास केला जाणार आहे. पोलिसांनी राहुल-प्रियंका यांना घेतले ताब्यात आंदोलन बराच वेळ सुरू राहिल्यानंतर दिल्ली पोलिसांनी परिसर रिकामा करण्याची कारवाई केली. यावेळी राहुल गांधी, प्रियंका गांधी आणि इतर काही विरोधी नेत्यांना पोलिसांनी ताब्यात घेतले. ताब्यात घेतल्यानंतर त्यांना किंग्सवे कॅम्प येथील न्यू पोलिस लाइन्समध्ये नेण्यात आले. त्यानंतर रात्री त्यांची सुटका करण्यात आली. विरोधकांचा नेमका आक्षेप काय? या आंदोलनामागे मतदार याद्यांच्या SIR प्रक्रियेचा मुद्दा प्रमुख आहे. विरोधी पक्षांकडून निवडणूक प्रक्रियेतील पारदर्शकता आणि मतदार याद्यांबाबत प्रश्न उपस्थित केले जात आहेत. तसेच या मुद्द्यावर निवडणूक आयोगाने स्पष्टीकरण द्यावे, अशी मागणी विरोधकांकडून केली जात आहे. या पार्श्वभूमीवर विरोधी खासदारांनी निवडणूक आयोगाच्या कार्यालयाकडे मोर्चा काढण्याचा प्रयत्न केला होता. मात्र पोलिसांनी त्यांना मार्गातच रोखले. दुसरीकडे, निवडणूक आयोगाने राजकीय पक्षांच्या भेटीबाबत आपली प्रक्रिया आणि भूमिका स्पष्ट केली आहे. त्यामुळे या संपूर्ण प्रकरणावरून सत्ताधारी आणि विरोधकांमध्ये राजकीय आरोप-प्रत्यारोप सुरू आहेत. FIR नंतर आता पुढे काय? FIR दाखल झाल्यानंतर दिल्ली पोलिसांकडून या प्रकरणाचा तपास केला जाण्याची शक्यता आहे. आकाशवाणी भवनात प्रवेशाची परिस्थिती, पोलिसांनी दिलेल्या सूचना, आंदोलनकर्त्यांची भूमिका आणि परिसरात प्रत्यक्षात काय घडले, याची माहिती तपासात महत्त्वाची ठरणार आहे. दरम्यान, या कारवाईमुळे राजकीय वातावरण आणखी तापण्याची शक्यता आहे. विरोधकांकडून निवडणूक प्रक्रियेच्या मुद्द्यावर आंदोलन सुरूच ठेवण्याचे संकेत दिले जात आहेत, तर पोलिसांकडून कायदेशीर प्रक्रियेनुसार पुढील कारवाई केली जाऊ शकते. राहुल गांधी आणि प्रियंका गांधी यांच्यासह विरोधी नेत्यांविरोधात दाखल झालेल्या या FIRमुळे आता राजकीय आंदोलन आणि कायदेशीर कारवाई यांचा मुद्दा चर्चेच्या केंद्रस्थानी आला आहे.

Rahul Gandhi: राहुल गांधी, प्रियंका गांधींसह विरोधी नेत्यांवर FIR; कारण काय? Read More »

PM Narendra Modi: जिल्हा भाजपच्या वतीने उद्या विकसित भारत संकल्प सभा आणि सेवा ज्योती यात्रेचे शहरात आयोजन

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

PM Narendra Modi: देशाचे पंतप्रधान नरेंद्र मोदी यांच्या राजकीय व सामाजिक कारकीर्दीस २५ वर्ष पूर्ण झाली आहेत. यानिमित्ताने अहिल्यानगर जिल्हा व शहर भारतीय जनता पार्टीच्या वतीने बुधवारी ७ ऑक्टोबर रोजी विकसित भारत संकल्प सभा आणि सेवा ज्योती यात्रेचे आयोजन शहरात केले आहे. सकाळी ९ वाजता आनंदधाम समोरील केशर गुलाब मंगल कार्यालयात या कार्यक्रमाचे आयोजन करण्यात आले आहे, अशी माहीती शहर जिल्हाअध्यक्ष अनिल मोहीते यांनी दिली. नरेंद्र मोदी यांच्या गुजरातचे मुख्यमंत्री ते पंतप्रधान या कारकिर्दीला यंदा २५ वर्ष पूर्ण झाली आहेत. याचा अभिमान आहिल्यानगर जिल्ह्यातील सर्व भाजपच्या पदाधिकारी, लोकप्रतिनिधी व कार्यकर्त्यांना आहे. यानिमित्ताने बुधवारी विकसित भारत संकल्प सभा आणि सेवा ज्योती यात्रेचे केले असून सकाळी ९ वाजता पंतप्रधान नरेंद्र मोदी दूरदृष्य प्रणालीद्वारे विकसित भारत संकल्प सभेस मार्गदर्शन करून पदाधिकारी कार्यकर्ते आणि नागरीकांशी संवाद साधणार आहेत. या संकल्प सभेस विधानपरीषदेचे सभापती प्रा.राम शिंदे, जलसंपदा तथा पालक मंत्री राधाकृष्ण विखे पाटील, भाजपाचे प्रदेश उपाध्यक्ष डॉ. सुजय विखे पाटील, आ.मोनिका राजळे, आ.विक्रमसिंह पाचपुते, आ.अक्षय कर्डीले, आ.प्राजक्त तनपुरे, आ.विवेक कोल्हे, जिल्हा प्रभारी माजी आमदार राम सातपुते, लक्ष्मण सावजी व भैरवी वाघ-पलांडे यांच्यासह जिल्ह्यातील सर्व आजी माजी पदाधिकारी उपस्थित राहाणार असल्याचे, जिल्हाध्यक्ष नितीन दिनकर यांनी सांगितले. संकल्प सभेनंतर सेवा ज्योती यात्रेचे आयोजन करण्यात आले आहे. या यात्रेस केशर गुलाब मंगल कार्यालयापासून प्रारंभ होऊन शहरातील महापुरूषांच्या पुतळ्यांना अभिवादन करून ग्रामदैवत श्री विशाल गणपती मंदीरात महाआरतीने यात्रेचा समारोप होईल. यासर्व कार्यक्रमास जिल्ह्यातील पदाधिकारी कार्यकर्त्यांनी मोठ्या संख्येने उपस्थित राहावे असे आवाहन भाजपाचे अहिल्यानगर दक्षिण जिल्हाध्यक्ष दिलीप भालसिंग, उत्तर जिल्हाध्यक्ष नितीन दिनकर व शहर जिल्हाअध्यक्ष अनिल मोहिते यांनी केले आहे.

PM Narendra Modi: जिल्हा भाजपच्या वतीने उद्या विकसित भारत संकल्प सभा आणि सेवा ज्योती यात्रेचे शहरात आयोजन Read More »

Gyanesh Kumar : मुख्य निवडणूक आयुक्त ज्ञानेश कुमार यांचा पगार किती? बंगला, गाडीपासून कोणकोणत्या सुविधा मिळतात?

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Gyanesh Kumar : देशातील निवडणूक प्रक्रियेची जबाबदारी असलेल्या भारतीय निवडणूक आयोगाच्या प्रमुखपदी असलेल्या मुख्य निवडणूक आयुक्तांना (CEC) नेमका किती पगार मिळतो, तसेच त्यांना कोणकोणत्या सरकारी सुविधा मिळतात, याबाबत नागरिकांमध्ये नेहमीच उत्सुकता असते. सध्या ज्ञानेश कुमार हे भारताचे मुख्य निवडणूक आयुक्त आहेत. त्यांनी 19 फेब्रुवारी 2025 रोजी देशाचे 26वे मुख्य निवडणूक आयुक्त म्हणून पदभार स्वीकारला. ज्ञानेश कुमार हे 1988 बॅचचे केरळ कॅडरचे IAS अधिकारी राहिले आहेत. केंद्र आणि केरळ सरकारमध्ये विविध महत्त्वाच्या जबाबदाऱ्या पार पाडल्यानंतर ते निवडणूक आयोगात निवडणूक आयुक्त म्हणून आले आणि त्यानंतर त्यांची मुख्य निवडणूक आयुक्त म्हणून नियुक्ती झाली. महिन्याला अडीच लाख रुपये मूळ वेतन मुख्य निवडणूक आयुक्तांच्या वेतनाबाबत सध्या उपलब्ध माहितीनुसार, CEC यांना दरमहा 2.50 लाख रुपये मूळ वेतन मिळते. हे वेतन कॅबिनेट सचिवाच्या वेतनाच्या बरोबरीचे आहे. यापूर्वी CEC आणि निवडणूक आयुक्तांचे वेतन सर्वोच्च न्यायालयाच्या न्यायाधीशांच्या वेतनाशी जोडलेले होते. मात्र CEC चे आर्थिक पॅकेज केवळ 2.50 लाख रुपयांच्या मूळ पगारापुरते मर्यादित नाही. पदाच्या स्वरूपानुसार विविध भत्ते आणि सरकारी सुविधा त्यांना मिळतात. दरमहा 34 हजार रुपयांचा भत्ता मुख्य निवडणूक आयुक्त आणि इतर निवडणूक आयुक्तांना दरमहा 34 हजार रुपयांचा भत्ता मिळतो. या भत्त्यावर मिळणारी आयकर सवलत न घेण्याचा निर्णय निवडणूक आयोगाने यापूर्वी स्वेच्छेने घेतला होता. म्हणजेच, मूळ वेतनाव्यतिरिक्त हा भत्ताही CEC यांच्या सेवाशर्तींचा महत्त्वाचा भाग आहे. सरकारी बंगला आणि इतर सुविधा मुख्य निवडणूक आयुक्त हे देशातील अत्यंत महत्त्वाच्या घटनात्मक पदांपैकी एक असल्याने त्यांना पदाच्या दर्जानुसार अनेक सरकारी सुविधा दिल्या जातात. यामध्ये सरकारी निवासस्थान, अधिकृत वाहन आणि चालक, सुरक्षा व्यवस्था यांचा समावेश होतो. तसेच वीज, पाणी आणि दूरध्वनी यांसारख्या सुविधाही नियमानुसार मोफत किंवा अनुदानित दरात उपलब्ध होतात. स्वतःसह कुटुंबीयांसाठी वैद्यकीय उपचार आणि आरोग्यविषयक सुविधाही मिळतात. कुटुंबासह LTC ची सुविधा CEC यांना स्वतःसाठी, पत्नी/पतीसाठी तसेच आश्रित कुटुंबीयांसाठी Leave Travel Concession (LTC) ची सुविधा मिळते. पूर्वी वर्षातून तीन वेळा LTCची सुविधा उपलब्ध होती. मात्र निवडणूक आयोगाने 2022 मध्ये मितव्ययाचा निर्णय घेत ही सुविधा स्वेच्छेने वर्षातून एकदा घेण्याचा निर्णय केला होता. तसेच या भत्त्यावरील आयकर सवलतीचा लाभ न घेण्याचेही ठरवण्यात आले होते. निवृत्तीनंतरही मिळतात लाभ मुख्य निवडणूक आयुक्त आणि निवडणूक आयुक्तांच्या सेवाशर्तींमध्ये निवृत्तीशी संबंधित काही लाभांचाही समावेश आहे. यामध्ये पेन्शन आणि इतर निवृत्तीविषयक लाभांचा समावेश होतो. तसेच कायद्यानुसार CEC आणि Election Commissioners यांना सर्वोच्च न्यायालयाच्या न्यायाधीशांच्या समकक्ष दर्जा आणि संबंधित सेवाशर्ती लागू होतात. कार्यकाळ पूर्ण झाल्यानंतर अर्जित रजेच्या 50 टक्के रजेचे रोखीकरण करण्याची तरतूदही आहे. ज्ञानेश कुमार यांची एकूण संपत्ती किती? ज्ञानेश कुमार यांच्या एकूण वैयक्तिक संपत्तीबाबत अधिकृत आणि सार्वजनिक स्वरूपात निश्चित माहिती उपलब्ध नाही. त्यामुळे सोशल मीडिया किंवा इतर ठिकाणी प्रसिद्ध होणाऱ्या आकडेवारीकडे अधिकृत माहिती म्हणून पाहणे योग्य ठरणार नाही.त्यांच्या मालमत्तेशी संबंधित माहिती सार्वजनिक करण्याबाबत यापूर्वी प्रश्न उपस्थित करण्यात आले होते. मात्र त्यावरून ज्ञानेश कुमार यांची नेमकी नेटवर्थ किती आहे, असा निश्चित निष्कर्ष काढता येत नाही. CEC पदाचे महत्त्व काय? भारताच्या लोकशाही व्यवस्थेत मुख्य निवडणूक आयुक्तांचे पद अत्यंत महत्त्वाचे आहे. लोकसभा, राज्यसभा, विधानसभा तसेच राष्ट्रपती आणि उपराष्ट्रपती पदाच्या निवडणुकांशी संबंधित घटनात्मक जबाबदाऱ्या भारतीय निवडणूक आयोगाकडे आहेत. CEC आणि इतर निवडणूक आयुक्तांचा कार्यकाळ सहा वर्षे किंवा वयाची 65 वर्षे पूर्ण होईपर्यंत यापैकी जे आधी येईल तेवढा असतो. मुख्य निवडणूक आयुक्तांना पदावरून हटविण्याची प्रक्रिया सर्वोच्च न्यायालयाच्या न्यायाधीशांप्रमाणे कठोर आहे.

Gyanesh Kumar : मुख्य निवडणूक आयुक्त ज्ञानेश कुमार यांचा पगार किती? बंगला, गाडीपासून कोणकोणत्या सुविधा मिळतात? Read More »

Rohit Pawar on Vikram Pachpute : 2029 ला निवडणूक कसा येतो बघतोस; रोहित पवारांनी अजितदादा स्टाईलने दिला पाचपुतेंना इशारा

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Rohit Pawar on Vikram Pachpute : महाराष्ट्र लोकसेवा आयोगाच्या (MPSC) कारभारावरून पुण्यात सुरू असलेल्या विद्यार्थ्यांच्या आंदोलनाला आता राजकीय संघर्षाचे स्वरूप येताना दिसत आहे. राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी भाजपचे आमदार विक्रम पाचपुते यांच्यावर जोरदार टीका करत 2029 च्या विधानसभा निवडणुकीबाबत थेट इशारा दिला आहे. पाचपुतेंनी आंदोलनावर केलेल्या टीकेला उत्तर देताना, “2029 मध्ये ही व्यक्ती विधानसभेत जाणार नाही, ही माझी जबाबदारी आहे,” असे रोहित पवार यांनी म्हटले. पुण्यात एमपीएससीच्या विद्यार्थ्यांचे आंदोलन गेल्या काही दिवसांपासून सुरू आहे. या आंदोलनात रोहित पवार सहभागी झाले असून, आयोगाच्या कारभाराबाबत विद्यार्थ्यांच्या विविध मागण्यांना त्यांनी पाठिंबा दिला आहे. याच आंदोलनाच्या पार्श्वभूमीवर रोहित पवार आणि विक्रम पाचपुते यांच्यात शाब्दिक संघर्ष सुरू झाला आहे. पाचपुतेंची रोहित पवारांवर टीका काही दिवसांपूर्वी भाजप आमदार विक्रम पाचपुते यांनी रोहित पवार यांच्या आंदोलनावर प्रश्न उपस्थित केले होते. पुण्यातील आंदोलन हे विद्यार्थ्यांचे आंदोलन न राहता राजकीय कार्यक्रम बनत असल्याचा दावा त्यांनी केला होता. आंदोलनाच्या ठिकाणी विद्यार्थ्यांची संख्या कमी असल्याचेही पाचपुते यांनी म्हटले होते. तसेच, रोहित पवार हे एमपीएससी आंदोलनाच्या माध्यमातून ‘अर्बन नक्षल’ तयार करण्याचा प्रयत्न करत असल्याचा गंभीर आरोपही पाचपुतेंनी केला होता. या वक्तव्यामुळे राजकीय वातावरण तापले आणि त्यानंतर रोहित पवारांनी पाचपुतेंना प्रत्युत्तर दिले. ‘सामान्य कुटुंबातील मुलांना अर्बन नक्षल म्हणता?’ रोहित पवार यांनी आंदोलनस्थळी विद्यार्थ्यांसमोर बोलताना पाचपुतेंच्या वक्तव्यावर तीव्र नाराजी व्यक्त केली. ते म्हणाले की, अहिल्यानगरमधील एका आमदाराला आपण आपला मित्र समजत होतो. मात्र, आपल्यावर टीका करताना त्यांनी सामान्य कुटुंबातील, शेतकरी कुटुंबातील आणि अधिकारी होण्याचे स्वप्न पाहणाऱ्या विद्यार्थ्यांना ‘अर्बन नक्षल’ असे संबोधले. विद्यार्थ्यांच्या आंदोलनाला अशा प्रकारे लेबल लावणे योग्य नसल्याचे सांगत रोहित पवार यांनी पाचपुतेंवर निशाणा साधला. चुकीचा शब्द वापरला असेल तर माफी मागता येते; मात्र आपण असे बोललोच नाही, अशी भूमिका घेणे योग्य नसल्याचेही त्यांनी म्हटले. ‘2029 ला विधानसभेत जाणार नाही’, रोहित पवारांचे वक्तव्य याचवेळी रोहित पवार यांनी विक्रम पाचपुतेंना थेट राजकीय आव्हान दिले. “2029 ला ही व्यक्ती विधानसभेत जाणार नाही, ही माझी जबाबदारी आहे,” असे वक्तव्य त्यांनी केले. या वक्तव्यामुळे पुण्यातील एमपीएससी आंदोलनाच्या पार्श्वभूमीवर सुरू असलेल्या राजकीय आरोप-प्रत्यारोपांना आणखी धार आली आहे. रोहित पवारांच्या या वक्तव्याची तुलना काही राजकीय चर्चांमध्ये अजित पवारांनी यापूर्वी केलेल्या निवडणुकीतील आव्हानाशी केली जात आहे. विक्रम पाचपुतेंचा पलटवार दरम्यान, रोहित पवारांच्या या टीकेनंतर विक्रम पाचपुते यांनीही प्रतिक्रिया देत त्यांच्यावर पलटवार केला आहे. रोहित पवारांच्या राजकीय भूमिकेचा किंवा व्यक्तिगत राजकीय संघर्षाचा परिणाम विद्यार्थ्यांवर होऊ नये, असे पाचपुते यांनी म्हटले. विद्यार्थ्यांचे प्रश्न हा कोणत्याही नेत्याच्या राजकीय प्रतिष्ठेचा विषय होऊ नये. स्वतःचा राजकीय इगो जपण्यासाठी विद्यार्थ्यांना आंदोलनात ओढणे योग्य नाही, अशी टीका पाचपुतेंनी केली. आंदोलनाचा उद्देश विद्यार्थ्यांच्या मागण्या सोडवणे असावा, असेही त्यांनी म्हटले. एमपीएससी आंदोलनाचा नेमका वाद काय? एमपीएससीच्या औषध निरीक्षक परीक्षेतील पेपरफुटीच्या प्रकरणानंतर स्पर्धा परीक्षांची तयारी करणाऱ्या विद्यार्थ्यांमध्ये नाराजी निर्माण झाली आहे. आयोगाचे अध्यक्ष विवेक भीमनवार आणि सचिव महेंद्र हरपाळकर यांच्या राजीनाम्याची मागणी विद्यार्थ्यांकडून करण्यात आली आहे. याच मागण्यांसाठी पुण्यात आंदोलन सुरू असून रोहित पवार त्यात सहभागी झाले आहेत. दरम्यान, एमपीएससी अध्यक्ष विवेक भीमनवार यांनी मुख्यमंत्र्यांकडे राजीनामा पाठवल्याचा दावा रोहित पवार यांनी केला आहे. या राजीनाम्यावर सरकारने निर्णय घ्यावा, अशी मागणीही त्यांनी केली आहे. निर्णय न झाल्यास पुणे बंदचा इशाराही रोहित पवारांनी दिला आहे. सरकारकडून चौकशीचा मुद्दा पुढे एमपीएससीच्या कामकाजातील कथित अनियमिततेबाबत चौकशी करण्यासाठी न्यायालयीन चौकशी समिती स्थापन करण्याची प्रक्रिया सरकारकडून पुढे नेली जात असल्याचे वृत्त आहे. मुख्यमंत्री देवेंद्र फडणवीस यांनी राज्यपालांकडे निवृत्त उच्च न्यायालयाच्या न्यायाधीशांच्या अध्यक्षतेखाली चौकशी समिती स्थापन करण्याची मागणी केल्याचे वृत्त आहे. त्यामुळे एमपीएससी विद्यार्थ्यांचे आंदोलन, आयोगाच्या कारभारावरील प्रश्न आणि त्यातून निर्माण झालेला राजकीय संघर्ष सध्या महाराष्ट्राच्या राजकारणात चर्चेचा विषय ठरला आहे. रोहित पवार आणि विक्रम पाचपुते यांच्यातील ताजा वाद पुढील काळात आणखी रंगण्याची शक्यता असून, विद्यार्थ्यांच्या मागण्यांवर सरकार आणि आयोग काय निर्णय घेतात, याकडे आता लक्ष लागले आहे.

Rohit Pawar on Vikram Pachpute : 2029 ला निवडणूक कसा येतो बघतोस; रोहित पवारांनी अजितदादा स्टाईलने दिला पाचपुतेंना इशारा Read More »

MPSC Protest : फुटपाथवरची रात्र आणि राजकारणाची नवी दिशा…

Leave a Comment / ऑटोमोबाईल, ट्रेंडिंग, ताज्या बातम्या, राजकीय, हायलाईट / dnamarathi.com

MPSC Protest: राजकारणात वारसा मोठा असणे ही संधी असते; पण त्या वारशाचे ओझे घेऊन रस्त्यावर उतरून संघर्ष करणे ही वेगळी बाब आहे. पुण्याच्या रस्त्यावर फुटपाथवर पाच रात्री मुक्काम केल्यानंतर सकाळी उठतानाचे रोहित पवार यांचे छायाचित्र म्हणूनच चर्चेचे ठरते. प्रश्न केवळ एका आमदाराने फुटपाथवर रात्र काढली, एवढाच नाही. प्रश्न आहे तो लोकप्रतिनिधी आणि सामान्य माणूस यांच्यातील अंतराचा. रोहित पवार आणि विश्वजीत कदम या दोघांची राजकीय पार्श्वभूमी सर्वश्रुत आहे. एकाला पवार घराण्याचा वारसा लाभला आहे, तर दुसऱ्याच्या मागे कदम घराण्याची प्रदीर्घ राजकीय परंपरा आहे. अशा पार्श्वभूमीतील नेत्यांनी रस्त्यावर उतरून विद्यार्थी, युवक आणि शेतकऱ्यांच्या प्रश्नांसाठी संघर्ष करणे हे राजकारणातील एका बदलत्या प्रवाहाचे संकेत मानता येतील. मात्र, केवळ फुटपाथवर झोपणे किंवा आंदोलनात सहभागी होणे यामुळे नेतृत्व सिद्ध होत नाही. संघर्षाचे फोटो हे प्रतीक असू शकतात; नेतृत्वाची खरी परीक्षा प्रश्न सोडवताना होते. आंदोलनानंतर प्रश्न किती पुढे जातो, सरकारवर किती परिणाम होतो आणि सामान्य माणसाच्या आयुष्यात प्रत्यक्ष काय बदल घडतो, यावरच या संघर्षाचे मूल्यमापन व्हायला हवे. आजच्या राजकारणात लोकप्रतिनिधींच्या जीवनशैलीबाबतही प्रश्न उपस्थित होतात. मोठ्या ताफ्यांतून फिरणारे नेते आणि दुसरीकडे रस्त्यावर सामान्य नागरिकांसोबत बसणारे नेते, या दोन प्रतिमा समाजासमोर उभ्या राहतात. मात्र लोकशाहीत प्रतिमेपेक्षा कृती महत्त्वाची असते. रोहित पवार यांच्या आंदोलनाकडेही याच कसोटीवर पाहायला हवे. त्यांच्यावर टीका करणारे असतील, समर्थन करणारेही असतील. पण विद्यार्थी आणि युवकांच्या प्रश्नांसाठी रस्त्यावर उतरण्याची त्यांची भूमिका दुर्लक्षित करता येणार नाही. त्याचवेळी या भूमिकेला सातत्य, अभ्यास आणि परिणामकारक राजकीय पाठपुरावा यांची जोड मिळणे आवश्यक आहे. महाराष्ट्राच्या राजकारणाला नव्या पिढीतील अभ्यासू आणि संघर्षशील नेतृत्वाची गरज आहे. वारसा हा प्रवेशाचा मार्ग असू शकतो; पण जनतेच्या मनात स्थान निर्माण करण्यासाठी कर्तृत्वाचीच परीक्षा द्यावी लागते. फुटपाथवरची एक रात्र राजकीय इतिहास बदलत नाही. मात्र, त्या रात्रीनंतरचा संघर्ष जर विद्यार्थ्यांच्या, युवकांच्या आणि शेतकऱ्यांच्या प्रश्नांना दिशा देत असेल, तर ती रात्र निश्चितच एका मोठ्या राजकीय प्रवासाची सुरुवात ठरू शकते.

MPSC Protest : फुटपाथवरची रात्र आणि राजकारणाची नवी दिशा… Read More »

Vikram Pachpute : रोहित पवार महाराष्ट्राचे नवीन पप्पू…आमदार विक्रम पाचपुते

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Vikram Pachpute : राष्ट्रवादीचे आमदार रोहित पवार यांचे पुणे या ठिकाणी सुरू असलेले आंदोलन हे आंदोलन राहिलेलं नसून रोहित पवार नाईट्स असल्याचा आरोप भाजपाचे आमदार विक्रम पाचपुते यांनी केला आहे. नाईट शिफ्टमध्ये हे आंदोलन सुरू आहे. दिवसभर तिथे फक्त 50, 100 लोक असतात हे काँग्रेस राष्ट्रवादीचे आंदोलन आहे. खासदार ओम राजे निंबाळकर हे आंदोलन स्थळी पोहोचले असता त्यांना विद्यार्थ्यांनी ट्रोल केलं असल्याचा आरोप देखील भाजपाचे आमदार विक्रम पाचपुते यांनी केला. आंदोलन स्थळावर एंटरटेनमेंट असतं तिथं कॉमेडीयन येऊन गेले आहेत तिथे वेगवेगळे गाणी होतात आता हे आंदोलन फक्त करमणुकीचे साधन राहिले आहे. रोहित पवार फक्त फार्स करतात, त्यांना लवकरच काँग्रेसमध्ये जायचं यासाठी त्यांचा आटापिटा सुरू आहे. त्यांना दिल्लीच्या नेतृत्वाला खुश करायचं महाराष्ट्राचे नवीन पप्पू तयार होता येते असं म्हणायला काही हरकत नाही असं म्हणत आमदार रोहित पवार यांच्यावरती भाजपचे आमदार विक्रम पाचपुते यांनी टीका केली.

Vikram Pachpute : रोहित पवार महाराष्ट्राचे नवीन पप्पू…आमदार विक्रम पाचपुते Read More »

Harshvardhan Sapkal : आदिवासी विद्यार्थ्यांची तात्काळ सुटका करा; अन्यथा वर्षा बंगल्याला घेराव घालणार

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Harshvardhan Sapkal : नाशिकहून मुंबईकडे लाँग मार्च काढलेल्या आदिवासी विद्यार्थ्यांनी रात्रीच्या मुक्कामासाठी काँग्रेसच्या टिळक भवन मुख्यालयात आश्रय घेतला होता. मात्र, मध्यरात्रीपासून पोलिसांनी विद्यार्थ्यांचा ससेमिरा सुरू केला आणि काँग्रेसच्या मुख्यालयात बेकायदा प्रवेश करून विद्यार्थीनींना धमकावले ताब्यात घेतले. पोलिसांनी NSUI अध्यक्ष सागर साळुंखे तसेच मुंबई NSUI अध्यक्षांना अटक केली आहे. “काँग्रेसच्या मुख्यालयात पोलिसांनी अशा बेकायदा पद्धतीने प्रवेश करून केलेली कारवाई दंडेलशाहीचे लक्षण आहे. अटक केलेल्या आदिवासी विद्यार्थ्यांची तसेच NSUI पदाधिकाऱ्यांची तात्काळ सुटका करावी,” “विद्यार्थ्यांची सुटका केली नाही, तर महाराष्ट्रातील काँग्रेसचे सर्व नेते मुंबईत येऊन वर्षा बंगल्याला घेराव घालतील असं काँग्रेस प्रदेशाध्यक्ष हर्षवर्धन सपकाळ यांनी म्हटलं आहे.

Harshvardhan Sapkal : आदिवासी विद्यार्थ्यांची तात्काळ सुटका करा; अन्यथा वर्षा बंगल्याला घेराव घालणार Read More »

Balasaheb Thorat : आदिवासी बांधवांनी आपल्या न्याय्य हक्कांसाठी आंदोलन करणे हा गुन्हा आहे का?

Leave a Comment / ताज्या बातम्या, राजकीय, हायलाईट / dnamarathi.com

Balasaheb Thorat : आपल्या न्याय्य मागण्यांसाठी नाशिकहून पायी मुंबईपर्यंत आलेले आदिवासी विद्यार्थी, महाराष्ट्र प्रदेश काँग्रेस कमिटीच्या टिळक भवन या मुख्यालयात मुक्कामी थांबले होते. मात्र मध्यरात्रीपासून पोलीस बेकायदेशीर रित्या, टिळक भवनमध्ये घुसून या विद्यार्थ्यांवर दबाव निर्माण करत आहेत, त्यांना धमकावत आहेत आणि चुकीच्या पद्धतीने अटकेची कारवाई केली जात असल्याची प्रतिक्रिया राज्याचे माजी मंत्री आणि काँग्रेस नेते बाळासाहेब थोरात यांनी दिली आहे. हे अत्यंत गंभीर आणि निषेधार्ह आहे असा उल्लेख करत त्यांनी राज्य सरकारवर जोरदार हल्लाबोल केला. आपल्या हक्कांसाठी शांततेच्या मार्गाने आवाज उठवणाऱ्या आदिवासी विद्यार्थ्यांशी सरकारने संवाद साधला पाहिजे. त्यांच्या समस्या ऐकल्या पाहिजेत. त्याऐवजी त्यांना पोलीस बळाच्या जोरावर दडपण्याचा प्रयत्न कशासाठी? लोकशाहीत प्रश्न विचारणे गुन्हा नाही. न्याय मागणे गुन्हा नाही. आंदोलन करणे गुन्हा नाही. महाराष्ट्र हा कायद्याचा, लोकशाहीचा आणि सामाजिक न्यायाचा सन्मान करणारा प्रदेश आहे. त्या महाराष्ट्रात न्याय मागणाऱ्या आदिवासी विद्यार्थ्यांशी संवाद करण्याऐवजी, सरकार त्यांना बेड्या ठोकत आहे. सरकारच्या या दडपशाहीच्या भूमिकेचा आम्ही तीव्र निषेध करतो. आदिवासी विद्यार्थ्यांच्या लढ्यात आम्ही ठामपणे त्यांच्या पाठीशी आहोत असं यावेळी बाळासाहेब थोरात म्हणाले.

Balasaheb Thorat : आदिवासी बांधवांनी आपल्या न्याय्य हक्कांसाठी आंदोलन करणे हा गुन्हा आहे का? Read More »

Vikhe Patil: शेवगावच्या हक्काचे पाणी कोणीही काढून घेणार नाही

Leave a Comment / ट्रेंडिंग, ताज्या बातम्या, शेती, हायलाईट / dnamarathi.com

Vikhe Patil: शेवगावच्या हक्काचे पाणी कोणीही काढून घेणार नाही.ताजनापूरच्या पहील्या आणि दुसर्या टप्प्यातील गावांना पाणी देताना कोणावरही अन्याय होवू न देता ताजपूरच्या तिसर्या टप्प्याची सुरूवात करण्याचा निर्णय जलसंपदा विभागाने घेतला असून,त्याच्या सर्व्हेक्षणासाठी एक कोटी रूपयांचा निधी मंजूर केला असल्याची माहीती न जलसंपदा तथा पालकमंत्री राधाकृष्ण विखे पाटील यांनी दिली. शेवगाव येथे मंत्री विखे पाटील यांच्या उपस्थितीत टंचाई आढावा बैठकीचे आयोजन करण्यात आले होते.आ.मोनिका राजळे अतिरिक्त जिल्हाधिकारी शैलेंद्र हिंगे जिल्हा परिषदेचे मुख्य कार्यकारी अधिकारी आनंद भंडारी जलसंपदा विभागाचे मुख्य अभियंता अरूण नाईक अभियंता सुनंदा जगताप पल्लवी जगताप जिल्हा अधीक्षक कृषी अधिकारी सुधाकर बोराळे यांच्यासह सर्व विभागाचे अधिकारी उपस्थित होते. मंत्री विखे पाटील यांनी तब्बल अडीच तास शेवगाव पाथर्डी तालुक्यातील शेतकरी नागरीक यांच्या तक्रारी जाणून घेत उपस्थित केलेल्या सर्व प्रश्नाबाबत त्यांनी विभागाच्या अधिकाऱ्यांकडून स्पष्टीकरण घेतले.प्राधान्याने पाणी व चारा यांचा प्रश्न गंभीर असून यावरच अधिक सूक्ष्मपणे आराखडा तयार करण्याच्या सूचना जिल्हाधिकारी आणि जिल्हा परिषदेच्या मुख्य कार्यकारी अधिकार्यांना दिल्या.टंचाईच्या परीस्थीतीत शेतकर्यांना पशुधनाचाच आधार मिळणार असून पशुधन वाचविण्यासाठी प्रयत्न करावे लागणार असल्याचे गांभिर्य अधिकार्यांनी घ्यावे आशा सूचना मंत्री विखे पाटील यांनी दिल्या. ताजनापूरच्या संदर्भात बोलतांना मंत्री विखे पाटील म्हणाले की सर्व शेतकऱ्यांना पाणी मिळावे हीच आमची भूमिका आहे.शेवगावचे हक्काचे पाणी कोणी काढून घेतलेले नाही.ताजनापूरच्या टप्पा एक मधील राहीलेली आठ गावे,दुसर्या टप्प्यातील बावीस गावांना पाणी देण्यासाठी आवश्यक असलेल्या निधीस मंजूरी देण्यात आली असून,राहीलेल्या गावांसाठी तिसरा टप्पा करण्याचा निर्णय जलसंपदा विभागाने घेतला असून या गावांचे सर्व्हेक्षण करण्यासाठी एक कोटी रुपयांचा निधी उपलब्ध करून देण्यात येईल पुढच्या तीन महीन्यात हे सव्हेक्षण पूर्ण करण्याचे आदेश त्यांनी जलसंपदा विभागाच्या अधिकाऱ्याना दिले. दुष्काळाची धग मोठ्या प्रमाणात असल्याने दोन्ही तालुक्यात असलेल्या सर्व पाझर तलावतील आणि बंधार्यातील गाळ काढण्याची मोहीम तातडीने सुरू करावी.यासाठी मागेल त्याला काम देण्याची तयारी ठेवून लोकांना दिलासा देण्याची जबाबदारी प्रशासकीय अधिकार्यानी घ्यावी. उपलब्ध असलेले पाणी पाण्यासाठी राखून ठेवावे लागणार आहे.उरर्वित पाणी शेतीला देण्याचा विचार होईल परंतू पाईप फोडून पाणी उचलण्याचा प्रयत्न झाल्यास गुन्हे दाखल करण्याचे आदेश दिलै असून,आतापर्तय ११४७ मोटारी जप्त करण्यात आल्याची माहीती मंत्री विखे पाटील यांंनी दिली. आ.मोनिका राजळे यांनी आपल्या भाषणात ताजनापूरच्या संदर्भात संभ्रम निर्माण करण्याचे काम झाले.त्यामुळे तिसरा टप्पा निर्माण करण्याचा जलसंपदा मंत्र्यांनी घेतेलेल्या निर्णयामुळे दोन वर्षात तिसरा टप्पा पूर्ण होईल आशी अपेक्षा व्यक्त केली.

Vikhe Patil: शेवगावच्या हक्काचे पाणी कोणीही काढून घेणार नाही Read More »

Radhakrishna Vikh Patil : चारा टंचाईवर मात करण्यासाठी सखोल नियोजन करणार

Leave a Comment / ट्रेंडिंग, ताज्या बातम्या, शेती, हायलाईट / dnamarathi.com

Radhakrishna Vikh Patil : जिल्ह्यातील पशुधनाची एकूण संख्या, लागणारा चारा आणि भविष्यातील चारा टंचाईवर मात करण्यासाठी अधिक सखोल नियोजन होण्याची आवश्यकता असून पशुसंवर्धन विभागाने तालुकानिहाय याचा सविस्तर आढावा घेवून आराखडा तयार करण्याच्या सूचना जलसंपदा तथा पालकमंत्री राधाकृष्ण विखे पाटील यांनी दिल्या. श्रीगोंदा तालुक्यातील टंचाई परीस्थीतीचा आढावा मंत्री विखे पाटील यांनी घेतला.आ.विक्रमसिंह पाचपुते भगवान पाचपुते राजेंद्र नागवडे अतिरीक्त जिल्हाधिकारी शैलेंद्र हिंगे कुकडीच्या अधिक्षक अभियंता अलका अहीरराव कृषि अधिकारी सुधाकर बोराळे महावितरण कंपनीचे अभियंता पवार यांच्यासह सर्व विभागाचे अधिकारी उपस्थित होते. श्रीगोंदा येथे टंचाई आढावा बैठकीत मंत्री विखे पाटील यांनी तालुक्यातील पशुधन आणि चारा नियोजनाबाबत पशुसंवर्धन विभागाच्या अधिकाऱ्यांनी केलेल्या सादरीकरणावर नाराजी व्यक्त केली.लहान मोठे जनावरे आणि शेळी मेंढी यांची संख्या चार्याची गरज यामध्ये तफावत दिसत असल्याने पशुसंवर्धन विभागाने शेतकर्याकडे असलेले पशुधन त्यांच्याकडून उपलब्ध होणारा चारा आणि पशुधन आहे पण चारा नाही,मूरघास बनविणारे शेतकरी आशी आकडेवारी पुन्हा संकलित करण्यास सांगितले.पशुधनाची सांख्यिकी माहीती विभागाने संकलित केली असल्याने त्याची मदत होईल याकडे मंत्र्यांनी लक्ष वेधले. वीज वितरण कंपनीने तालुक्यात मोठ्या संख्येने सौर कृषी पंप दिले.तरीही भारनियमानाचे प्रमाण कमी का होत नाही असा प्रश्न विखे पाटील यांनी उपस्थित केला.तालुक्यात असलेले फिडर त्यावर येत असलेला भार याचाही आढावा घेवून घेण्याच्या सूचना त्यांनी महावितरणच्या अधिकार्यांना दिल्या. महाराष्ट्र जीवन प्राधिकरण व जलजीवन मिशन अंतर्गत सुरू असलेल्या नऊ पैकी आठ योजनांची काम पन्नास टक्के एवढीच झाली आहेत.यासाठी किती निधीची आवश्यकता आहे त्याचा प्रस्तावही सादर करण्याचे निर्देश दिले. टॅकरच्या नियोजनासाठी तहसिलदार गटविकास अधिकारी ग्रामसेवक आणि तलाठी यांनी वस्तूनिष्ठ माहीतीचा आरखडा पुन्हा सादर करावा भविष्यातील पाणी टंचाई लक्षात घेवून कुकडी आणि सीना लाभक्षेत्रात किती टॅकरची आवश्यकता आहे त्याचे वेळापत्रक आणि अॅप मध्ये माहीती भरावी. पीकविमा योजनेपासून शेतकरी दूर जात आहे.मंत्री विखे पाटील यांनी मागील वर्षी शेतकर्याना मिळालेला विमा योजनेचा लाभ आणि आता योजनेत कमी झालेली शैतकर्यांची संख्या यामध्ये फरक असल्याने कृषी विभागाने योजनेच्या संदर्भात अधिक प्रसार प्रचार करण्याची अपेक्षा व्यक्त केली. दुष्काळी परीस्थीतीच्या पार्श्वभूमीवर लोकांचा रोष खूप मोठा आहे.मात्र इतर योजनांचा लाभ सुरू असल्याने नागरीकांना दिलासा मिळतो.मात्र आशा काळात सरकार आणि प्रशासनाची जबाबदारी ही समाजघटकांना आधार देण्याची आहे.अतिशय संवेदनशील आणि पारदर्शीपणे संकटात काम करा असे आवाहन मंत्री विखे पाटील यांनी केले. मंत्री विखे पाटील यांनी साकळाई योजनेला मंजूरी मिळवून निधी उपलब्ध करून दिल्याबद्दल उपस्थित शेतकऱ्यांनी त्यांचे आभार मानले.मात्र सिना धरणातून आवर्तन देण्याची मागणी केली.यासंर्भात पाण्याची उपलब्धता लक्षात घेवून शेतकरी हिताचा निर्णय करण्याची ग्वाही त्यांनी लाभधारक शेतकऱ्यांशी बोलतांना दिली.

Radhakrishna Vikh Patil : चारा टंचाईवर मात करण्यासाठी सखोल नियोजन करणार Read More »