Latur Courier Parcel Blast : लातूर शहरात कुरिअर पार्सलचा अचानक भीषण स्फोट झाल्याची धक्कादायक घटना समोर आली आहे. शहरातील उद्योग भवन परिसरात असलेल्या उमाटे कुरिअर सर्व्हिसमध्ये सामानाची चढ-उतार सुरू असताना हा स्फोट झाला. या घटनेत एक कर्मचारी गंभीर जखमी झाला असून, कुरिअरच्या वाहनाचेही मोठ्या प्रमाणात नुकसान झाले आहे. या घटनेमुळे परिसरात खळबळ उडाली आहे.
नेमका प्रकार काय?
मिळालेल्या माहितीनुसार, उमाटे कुरिअर सर्व्हिसमध्ये नेहमीप्रमाणे पार्सल आणि इतर सामानाची हाताळणी सुरू होती. याचदरम्यान एका पार्सलचा अचानक मोठा स्फोट झाला. स्फोटाची तीव्रता इतकी होती की, काही काळ परिसरातील नागरिक आणि कर्मचाऱ्यांना नेमके काय घडले, हे समजले नाही. या स्फोटात पार्सल उतरवण्याचे काम करणारा एक कर्मचारी गंभीर जखमी झाला. त्याला तातडीने उपचारासाठी खासगी रुग्णालयात दाखल करण्यात आले आहे.
स्फोटात वाहनाचे मोठे नुकसान
या घटनेत कुरिअरच्या वाहनाचेही मोठ्या प्रमाणात नुकसान झाले आहे. स्फोटाच्या तीव्रतेमुळे वाहनाचे छत आणि काचा उडून पडल्याची माहिती समोर आली आहे. नियमित कामकाज सुरू असताना अचानक घडलेल्या या घटनेमुळे कुरिअर सेवा केंद्रातील कर्मचाऱ्यांमध्ये भीतीचे वातावरण निर्माण झाले.
पोलीस आणि श्वानपथक घटनास्थळी दाखल
घटनेची माहिती मिळताच लातूर पोलिसांचे पथक आणि श्वानपथक घटनास्थळी दाखल झाले. अतिरिक्त पोलीस अधीक्षक मंगेश चव्हाण यांनीही घटनास्थळी भेट देऊन पाहणी केली. स्फोट झालेल्या पार्सलमध्ये नेमके कोणते साहित्य होते, ते कोणी पाठवले होते आणि स्फोट कशामुळे झाला, याचा तपास पोलिसांकडून सुरू आहे.
पार्सलमध्ये नेमके काय होते? तपास सुरू
कुरिअर सेवा केंद्राच्या संचालकांनी दिलेल्या माहितीनुसार, बाहेरून येणाऱ्या पार्सलमधील साहित्याची माहिती कुरिअर सेवेकडे नेहमीच उपलब्ध असेल असे नाही. त्यामुळे संबंधित पार्सल कुठून आले, ते कोणी पाठवले आणि त्यामध्ये कोणते साहित्य होते, याची माहिती मिळवण्याचे काम सुरू आहे. दरम्यान, हा स्फोट नेमका कशामुळे झाला, याबाबत अद्याप स्पष्टता आलेली नाही. पार्सलमध्ये संशयास्पद वस्तू होती का किंवा अन्य कोणत्या कारणामुळे स्फोट झाला, याचा निष्कर्ष तपासानंतरच स्पष्ट होणार आहे.
लातूरमधील घटनेने खळबळ
कुरिअर सेवेसारख्या नियमित कामकाजाच्या ठिकाणी अशा प्रकारचा स्फोट झाल्याने सुरक्षेचा प्रश्न ऐरणीवर आला आहे. एका कर्मचाऱ्याला गंभीर दुखापत झाली असून वाहनाचेही नुकसान झाले आहे. या घटनेमागील नेमके कारण शोधणे आणि संबंधित पार्सलच्या स्रोताचा शोध घेणे, हे आता पोलिसांसमोरील महत्त्वाचे आव्हान आहे. पोलिसांच्या तपासातून या स्फोटामागील कारण आणि पार्सलमधील साहित्याबाबत अधिक माहिती समोर येण्याची अपेक्षा आहे.
