Rajpal Yadav : बॉलिवूडमधील प्रसिद्ध अभिनेता राजपाल यादव पुन्हा एकदा सोशल मीडियावर चर्चेत आहे. सेंट्रल बँक ऑफ इंडियाचे तब्बल 16 कोटी रुपयांहून अधिक कर्ज थकीत असल्याने त्यांच्या उत्तर प्रदेशातील शाहजहानपूर येथील दोन मालमत्तांचा 9 सप्टेंबर रोजी लिलाव होणार आहे.
माहितीनुसार, चित्रपट निर्मिती आणि दिग्दर्शनासाठी घेतलेल्या कर्जाची वेळेत परतफेड न झाल्याने बँकेने ही कारवाई सुरू केली आहे. अनेक वेळा नोटिसा देऊनही थकबाकीची रक्कम जमा न झाल्यामुळे अखेर मालमत्तांच्या लिलावाचा निर्णय घेण्यात आला.
राजपाल यादव यांना यापूर्वीही आर्थिक आणि कायदेशीर प्रकरणांचा सामना करावा लागला आहे. आता या नव्या कारवाईमुळे त्यांच्या अडचणींमध्ये आणखी वाढ झाली आहे. मात्र, या प्रकरणावर राजपाल यादव किंवा त्यांच्या टीमकडून अद्याप कोणतीही अधिकृत प्रतिक्रिया देण्यात आलेली नाही.
दरम्यान, या घडामोडींमुळे बॉलिवूडमध्येही चर्चा रंगली असून, 9 सप्टेंबर रोजी होणाऱ्या लिलावाकडे सर्वांचे लक्ष लागले आहे.
