Dhruv Rathee : प्रसिद्ध यूट्यूबर ध्रुव राठी यांना दिल्लीतील जंतर-मंतर येथे आयोजित करण्यात आलेल्या प्रस्तावित आंदोलनापूर्वी गुरुग्राम येथून पोलिसांनी ताब्यात घेतल्याचे वृत्त समोर आले आहे. मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉकरोच जनता पार्टी (CJP) तर्फे हे आंदोलन आयोजित करण्यात येणार होते.
मिळालेल्या वृत्तानुसार, ध्रुव राठी हे आंदोलनात सहभागी होण्यासाठी दिल्ली-एनसीआर परिसरात आले होते. शनिवारी सकाळी गुरुग्राममधील सेक्टर ५६ येथील त्यांच्या निवासस्थानातून त्यांना ताब्यात घेण्यात आल्याचे वृत्त माध्यमांनी दिले आहे. मात्र, या कारवाईबाबत अधिकृत पुष्टी उपलब्ध नसल्याचेही वृत्तांत नमूद करण्यात आले आहे.
काय आहे आंदोलनामागील कारण?
कॉकरोच जनता पार्टीने मतदार याद्यांच्या विशेष सखोल पुनरावलोकन प्रक्रियेवर (SIR) आक्षेप घेत मुख्य निवडणूक आयुक्त ज्ञानेश कुमार यांच्या राजीनाम्याची मागणी केली आहे. मतदार याद्यांमधील कथित अनियमितता आणि पारदर्शकतेच्या मुद्द्यांवरून या आंदोलनाची हाक देण्यात आली होती.यापूर्वी बंगळुरू येथे झालेल्या आंदोलनातही ध्रुव राठी आणि अभिनेते प्रकाश राज सहभागी झाले होते.
दिल्लीमध्ये कडेकोट सुरक्षा व्यवस्था
जंतर-मंतर येथील प्रस्तावित आंदोलनाला दिल्ली पोलिसांनी परवानगी नाकारल्याचे वृत्त आहे. आंदोलनासाठी उशिरा अर्ज करण्यात आल्याचे आणि कायदा-सुव्यवस्थेच्या संभाव्य प्रश्नांचे कारण पोलिसांकडून देण्यात आल्याचे सांगितले जात आहे. आंदोलनाच्या पार्श्वभूमीवर दिल्ली आणि आसपासच्या परिसरात सुरक्षा व्यवस्था वाढवण्यात आली आहे.
अधिकृत पुष्टीची प्रतीक्षा
ध्रुव राठी यांना ताब्यात घेण्यात आल्याच्या वृत्तामुळे राजकीय आणि सामाजिक वर्तुळात चर्चा सुरू झाली आहे. तथापि, त्यांना ताब्यात घेण्यामागील अधिकृत कारण आणि पुढील कायदेशीर कारवाई याबाबत स्पष्ट माहिती उपलब्ध होणे बाकी आहे.
