Pune Police : पुणे पोलीस आयुक्त अमितेश कुमार यांच्या निवासस्थानाबाहेर एका पोलीस कर्मचाऱ्याने गोंधळ घातल्याचा प्रकार समोर आला आहे. अमोल भिसे असे संबंधित कर्मचाऱ्याचे नाव असून, बदलीवरून नाराज असल्याने त्याने हा प्रकार केल्याची प्राथमिक माहिती आहे. मंगळवारी सायंकाळी घडलेल्या या घटनेमुळे पोलीस वर्तुळात खळबळ उडाली आहे.
मिळालेल्या माहितीनुसार, अमोल भिसे हा चारचाकी वाहनातून पोलीस आयुक्तांच्या बंगल्याबाहेर आला. यावेळी कथित मद्यधुंद अवस्थेत त्याने आरडाओरडा करत शिवीगाळ केल्याचे सांगितले जात आहे. अचानक घडलेल्या या प्रकारामुळे परिसरात काही काळ तणावाचे वातावरण निर्माण झाले.
भिसे याची काही दिवसांपूर्वी बदली करण्यात आली होती. मात्र, अपेक्षित ठिकाणी बदली न झाल्याने तो नाराज होता, अशी चर्चा आहे. याच नाराजीतून त्याने वरिष्ठ अधिकाऱ्यांच्या निवासस्थानाबाहेर जाऊन गोंधळ घातल्याची माहिती समोर येत आहे.
घटनेची माहिती मिळताच संबंधित कर्मचाऱ्याविरोधात कारवाईच्या हालचाली सुरू झाल्या. रात्री उशिरापर्यंत कोरेगाव पार्क पोलीस ठाण्यात गुन्हा दाखल करण्याची प्रक्रिया सुरू असल्याचे समजते. मात्र, गुन्ह्याचे नेमके स्वरूप आणि पोलिसांकडून करण्यात आलेली कारवाई याबाबत अधिकृत माहिती समोर येणे बाकी आहे.
बदल्यांवरून पोलीस दलात नाराजीचा सूर?
या घटनेच्या निमित्ताने पुणे पोलीस दलातील बदल्यांचा विषय पुन्हा चर्चेत आला आहे. कर्मचाऱ्यांच्या बदल्या, नियुक्त्या आणि प्रशासकीय निर्णयांबाबत पोलीस कर्मचाऱ्यांमध्ये नाराजी असल्याची चर्चा सुरू आहे.
दरम्यान, पुणे पोलीस दलात कथित वसुलीच्या प्रकारांना आळा घालण्यासाठी यापूर्वी काही कर्मचाऱ्यांच्या बदल्या करण्यात आल्याची माहिती आहे. संबंधित कर्मचाऱ्यांना प्रशिक्षण दिल्यानंतर वेगवेगळ्या पोलीस ठाण्यांमध्ये नियुक्त करण्यात आले होते. असे असतानाही काही भागांत वसुलीच्या तक्रारी कायम असल्याचा दावा केला जात आहे. यामुळे यापूर्वी कारवाई झालेल्या कर्मचाऱ्यांच्या भूमिकेबाबतही चर्चा होत आहे.
पोलीस दलात एखाद्या गंभीर घटनेनंतर संबंधित पोलीस ठाण्याच्या वरिष्ठ अधिकाऱ्यांवर तातडीने प्रशासकीय कारवाई केली जाते, अशी उदाहरणे आहेत. मात्र, काही प्रकरणांमध्ये अशाच प्रकारची कारवाई होत नसल्याची चर्चा पोलीस वर्तुळात आहे. त्यामुळे वरिष्ठ अधिकारी आणि कर्मचाऱ्यांसाठी कारवाईचे निकष समान आहेत का, असा प्रश्न उपस्थित केला जात आहे.
पोलीस दलात शिस्त, वरिष्ठांचे आदेश आणि प्रशासकीय निर्णयांना महत्त्व असते. अशा परिस्थितीत एखाद्या कर्मचाऱ्याने थेट पोलीस आयुक्तांच्या निवासस्थानाबाहेर जाऊन गोंधळ घालणे ही गंभीर बाब मानली जात आहे. या घटनेमुळे संबंधित कर्मचाऱ्यावर कोणती कारवाई होते, तसेच पोलीस दलातील अंतर्गत नाराजीच्या मुद्द्यावर वरिष्ठ प्रशासन काय भूमिका घेते, याकडे लक्ष लागले आहे.
