MPSC Exam : महाराष्ट्र लोकसेवा आयोगाच्या (MPSC) औषध निरीक्षक अर्थात Drug Inspector, गट-ब पदाच्या परीक्षेतील कथित पेपरफुटी प्रकरणाचा तपास आता अधिक वेगाने सुरू झाला आहे. मुंबई पोलिसांच्या गुन्हे शाखेच्या विशेष तपास पथकाने (SIT) आणखी चार जणांना अटक केली आहे. यामध्ये दोन मध्यस्थ आणि दोन परीक्षार्थींचा समावेश आहे. या नव्या कारवाईनंतर प्रकरणातील अटक करण्यात आलेल्या आरोपींची संख्या 11 वर पोहोचली आहे.
सांगोला, बुलढाणा आणि नवी मुंबईत कारवाई
गुन्हे शाखेने केलेल्या कारवाईत साजिद संदे याला सांगोला येथून, तर विजय किंगर याला बुलढाणा येथून ताब्यात घेण्यात आले. याशिवाय मध्यस्थ म्हणून भूमिका बजावल्याचा आरोप असलेल्या संदीप खलाटे आणि भैरवनाथ कदम या दोघांना नवी मुंबई परिसरातून अटक करण्यात आली आहे. पोलिसांकडून या सर्व आरोपींची चौकशी सुरू असून पेपरफुटीच्या संपूर्ण नेटवर्कचा तपास केला जात आहे.
यापूर्वी 7 जणांना अटक
या प्रकरणात याआधीही मुंबई गुन्हे शाखेने कारवाई केली होती. त्यामध्ये MPSCचे अवर सचिव अभिजीत लेंडवे, गोपनीय कक्षात काम करणारे सहाय्यक कक्ष अधिकारी विश्वेश्वर नकाते आणि गोपाळ मराठे, कौटिल्य अकॅडमीचे संचालक प्रवीण पाटील, तसेच मध्यस्थ अमृत पाटील, लोकेश उर्फ गौरव पाटील आणि परीक्षार्थी ऋतुजा पाटील यांचा समावेश आहे.
यापूर्वी झालेल्या तपासात आरोपींच्या मोबाईलमधील डिजिटल पुरावेही पोलिसांच्या हाती लागले आहेत. एका आरोपीच्या मोबाईलमधील सुमारे 270 पानांच्या WhatsApp चॅटमधून पेपरफुटीच्या कथित व्यवहाराबाबत महत्त्वाची माहिती समोर आल्याचे वृत्त आहे. या संभाषणात परीक्षेपूर्वी प्रश्न उपलब्ध झाल्याचा दावा आणि पैशांच्या व्यवहाराचा उल्लेख असल्याचे तपासात समोर आले होते. मात्र, या चॅटमधील दाव्यांची स्वतंत्रपणे पडताळणी करणे तपासाचा भाग आहे.
नेमकं प्रकरण काय आहे?
MPSCने अन्न व औषध प्रशासनातील औषध निरीक्षक (Drug Inspector), गट-ब संवर्गातील 154 पदांसाठी 22 मार्च 2026 रोजी महाराष्ट्रातील सहा विभागीय मुख्यालयांवर स्क्रीनिंग परीक्षा घेतली होती. या परीक्षेच्या प्रश्नपत्रिकेतील प्रश्न परीक्षा होण्यापूर्वीच काही व्यक्तींपर्यंत पोहोचल्याचा आरोप तपासात समोर आला आहे. पोलिसांच्या म्हणण्यानुसार, प्रश्नांचा गैरवापर करून स्वतंत्र संच तयार करण्यात आला आणि तो अनधिकृत व्यक्तींमध्ये प्रसारित करण्यात आला.
या प्रकरणामुळे MPSCच्या परीक्षेच्या पारदर्शकतेवरही प्रश्न उपस्थित झाले. सुरुवातीला आयोगाने प्रकरण पोलिसांकडे चौकशीसाठी सोपवले होते. त्यानंतर प्राथमिक पोलिस तपासात गैरप्रकाराच्या शक्यता समोर आल्यानंतर औषध निरीक्षक पदाची संपूर्ण भरती प्रक्रिया रद्द करण्यात आली.
488 उमेदवारांच्या मुलाखती झाल्या होत्या
या भरती प्रक्रियेत 154 पदांसाठी 22 मार्च रोजी स्क्रीनिंग परीक्षा घेण्यात आली. त्यानंतर 12 जून रोजी निकाल जाहीर झाला आणि 506 उमेदवार मुलाखतीसाठी पात्र ठरले. यापैकी 488 उमेदवारांच्या मुलाखती 1 ते 22 जुलैदरम्यान घेण्यात आल्या होत्या. मात्र, पेपरफुटीच्या आरोपांच्या तपासामुळे पुढील प्रक्रिया थांबवण्यात आली आणि अखेर भरतीच रद्द करण्यात आली.
आरोपींचा शोध आणखी वाढणार
नवीन चार अटकांनंतर पोलिसांसमोर आता या कथित पेपरफुटीची संपूर्ण साखळी शोधण्याचे आव्हान आहे. प्रश्नपत्रिका नेमकी कोणत्या टप्प्यावर बाहेर पडली, ती कोणाकडून कोणाकडे पोहोचली, मध्यस्थांची भूमिका काय होती आणि या प्रकरणात आणखी किती जणांचा सहभाग आहे, याचा तपास सुरू आहे. पोलिस आर्थिक व्यवहार, मोबाईल संभाषण आणि इतर डिजिटल पुराव्यांच्या आधारे या नेटवर्काचा माग काढत आहेत.
दरम्यान, या प्रकरणातील आरोपींना न्यायालयीन कोठडी सुनावण्यात आल्याचेही पुढील न्यायालयीन कार्यवाहीत समोर आले आहे. 5 ऑक्टोबरपर्यंत सर्व आरोपींना न्यायालयीन कोठडी देण्यात आल्याचे वृत्त आहे.
