हायलाईट - DNA मराठी

1 सप्टेंबरपासून सर्वसामान्यांच्या खिशावरपरिणाम; दूध, CNG आणि कमर्शियल LPG महाग

Leave a Comment / ऑटोमोबाईल, ट्रेंडिंग, ताज्या बातम्या, हायलाईट / dnamarathi.com

September Rules : सप्टेंबर महिन्याची सुरुवात सर्वसामान्य नागरिकांसाठी काही महत्त्वाचे आर्थिक बदल घेऊन झाली आहे. आजपासून दूध, CNG आणि व्यावसायिक वापराच्या LPG सिलिंडरच्या दरात वाढ झाली आहे. दुसरीकडे विमानतळावरील काही शुल्क कमी करण्यात आल्याने काही प्रवाशांना दिलासा मिळणार आहे. मात्र, या सर्व बदलांचा परिणाम संपूर्ण देशात एकसारखा होणार नसून काही दर विशिष्ट शहरांपुरते मर्यादित आहेत. मुंबईत भैंसच्या दुधाच्या दरात मोठी वाढ मुंबई आणि आसपासच्या परिसरात तबेल्यातून मिळणाऱ्या खुल्या भैंसच्या दुधाच्या घाऊक दरात मोठी वाढ करण्यात आली आहे. 1 सप्टेंबरपासून दूधाचा दर 93 रुपयांवरून 102 रुपये प्रति लिटर करण्यात आला आहे. म्हणजेच घाऊक दरात थेट 9 रुपयांची वाढ झाली आहे. ही नवीन दररचना 28 फेब्रुवारी 2027 पर्यंत लागू राहणार आहे. पशुखाद्य, चारा, वाहतूक तसेच जनावरांच्या देखभालीचा वाढता खर्च यामुळे दूध उत्पादकांवरील आर्थिक भार वाढल्याचे सांगण्यात येत आहे. मात्र, या निर्णयाचा अर्थ देशभरातील सर्व प्रकारच्या पॅकेज्ड किंवा ब्रँडेड दुधाच्या किमती वाढल्या असा होत नाही. ग्राहकांना प्रत्यक्षात किती दर द्यावा लागेल, हे विक्रेता आणि स्थानिक बाजारपेठेनुसार बदलू शकते. कमर्शियल LPG सिलिंडरही महाग 19 किलोच्या व्यावसायिक LPG सिलिंडरच्या किमतीतही 1 सप्टेंबरपासून वाढ झाली आहे. देशातील विविध शहरांमध्ये सुमारे 9.50 रुपयांची वाढ करण्यात आली आहे. उदाहरणार्थ, दिल्लीमध्ये 19 किलोचा सिलिंडर 2,738 रुपयांवरून 2,747.50 रुपये झाला आहे. चेन्नईमध्ये तो 2,906 रुपयांवरून 2,916.50 रुपये झाला. मुंबईतही किंमत 2,691.50 रुपयांवरून 2,701 रुपये झाली आहे. या वाढीचा थेट परिणाम हॉटेल, रेस्टॉरंट, ढाबे, मिठाईची दुकाने आणि इतर व्यावसायिक LPG वापरणाऱ्या व्यवसायांवर होऊ शकतो. त्यामुळे पुढील काळात खाद्यपदार्थांच्या किमतीवरही त्याचा अप्रत्यक्ष परिणाम होण्याची शक्यता आहे. घरगुती LPG सिलिंडरबाबत दिलासा व्यावसायिक सिलिंडरच्या किमतीत वाढ झाली असली तरी 14.2 किलोच्या घरगुती LPG सिलिंडरच्या दरात या बदलामुळे वाढ करण्यात आलेली नाही. त्यामुळे घरगुती ग्राहकांना या निर्णयाचा थेट फटका बसलेला नाही. मुंबई आणि पुण्यात CNG महाग CNG वापरणाऱ्या वाहनधारकांसाठीही सप्टेंबरची सुरुवात काहीशी महाग ठरली आहे. मुंबई महानगर क्षेत्रात CNG च्या दरात प्रति किलो 2 रुपयांची वाढ झाली असून नवीन दर 88 रुपये प्रति किलो झाला आहे. पुण्यातही CNG दरात प्रति किलो 2 रुपयांची वाढ झाली आहे. मात्र, ही वाढ संपूर्ण देशात लागू झालेली नाही. CNGचे दर शहर, स्थानिक गॅस कंपनी आणि पुरवठ्याच्या परिस्थितीनुसार वेगवेगळे असतात. CNGच्या दरवाढीमुळे खासगी वाहनधारकांसोबतच कॅब, ऑटो आणि व्यावसायिक वाहतूक क्षेत्राच्या खर्चावरही परिणाम होऊ शकतो. मुंबईत CNG, दूध आणि इतर वाहतूक खर्चात एकाचवेळी वाढ झाल्याने नागरिकांच्या मासिक बजेटवर अतिरिक्त भार पडण्याची शक्यता आहे. विमान तिकीट महाग झाले का? 1 सप्टेंबरपासून विमानतळावरील शुल्क व्यवस्थेत काही महत्त्वाचे बदल करण्यात आले आहेत. मात्र, देशभरातील विमान तिकिटे सरसकट महाग झाली आहेत, असे म्हणणे योग्य ठरणार नाही. बेंगळुरू विमानतळावर येणाऱ्या प्रवाशांकडून प्रथमच User Development Fee (UDF) आकारला जाणार आहे. देशांतर्गत आगमनासाठी हा शुल्क 125 रुपये, तर आंतरराष्ट्रीय आगमनासाठी 426 रुपये आहे. दुसरीकडे, विमानतळावरून प्रस्थान करणाऱ्या प्रवाशांसाठी शुल्क कमी करण्यात आले आहे. देशांतर्गत प्रस्थान शुल्क 550 रुपयांवरून 300 रुपये, तर आंतरराष्ट्रीय प्रस्थान शुल्क 1,500 रुपयांवरून 997 रुपये करण्यात आले आहे. त्यामुळे बेंगळुरू विमानतळावरून प्रवास करणाऱ्या काही प्रवाशांना एकूण शुल्काच्या दृष्टीने दिलासा मिळू शकतो. हैदराबाद विमानतळावरही देशांतर्गत आणि आंतरराष्ट्रीय प्रस्थान शुल्कात बदल करण्यात आला आहे. विमान तिकिटाची अंतिम किंमत मात्र विमान कंपनी, प्रवासाचा मार्ग, प्रवासाची तारीख, मागणी आणि इतर शुल्कांवर अवलंबून असते. त्यामुळे विमान तिकिटांच्या किमतीबाबत प्रत्येक प्रवाशाने बुकिंगच्या वेळी अंतिम भाडे तपासणे महत्त्वाचे आहे. सर्वसामान्यांच्या बजेटवर काय परिणाम? 1 सप्टेंबरपासून झालेल्या या बदलांकडे पाहिल्यास नागरिकांना महागाईचा काही प्रमाणात अतिरिक्त भार सहन करावा लागू शकतो. मुंबईतील दूध दरवाढीचा परिणाम थेट घरगुती खर्चावर होऊ शकतो. CNG महागल्याने वाहन चालवण्याचा खर्च वाढणार आहे. त्याचबरोबर कमर्शियल LPGच्या दरवाढीचा अप्रत्यक्ष परिणाम हॉटेल आणि खाद्यपदार्थांच्या किमतीवर होऊ शकतो. दुसरीकडे, घरगुती LPG सिलिंडरच्या दरात वाढ न होणे आणि काही विमानतळांवरील प्रस्थान शुल्क कमी होणे हे नागरिकांसाठी दिलासादायक बदल आहेत.

1 सप्टेंबरपासून सर्वसामान्यांच्या खिशावरपरिणाम; दूध, CNG आणि कमर्शियल LPG महाग Read More »

Ram Shinde : राज्यपाल जिष्णु देव वर्मा यांच्या हस्ते ‘ग्रीन क्रुसेडर्स आणि अचिव्हर्स पुरस्कार’ वितरण

Leave a Comment / ऑटोमोबाईल, ट्रेंडिंग, ताज्या बातम्या, हायलाईट / dnamarathi.com

Ram Shinde : विकास आणि पर्यावरण यांच्यात संघर्ष नसून, दोन्हींची सांगड घालून शाश्वत विकास साधणे ही काळाची गरज आहे. निसर्गाचे संवर्धन करणे हे प्रत्येक नागरिकाचे मूलभूत कर्तव्य असून, येणाऱ्या पिढ्यांसाठी सुरक्षित पर्यावरणाचा वारसा सोपविणे ही आपली सामूहिक जबाबदारी आहे, असे प्रतिपादन राज्यपाल जिष्णु देव वर्मा यांनी केले. भामला फाउंडेशन आणि पंचशील रिअॅलिटी यांच्या संयुक्त विद्यमाने आयोजित ‘नाला सुशोभीकरण मोहीम’ तसेच ‘ग्रीन क्रुसेडर्स आणि अचिव्हर्स पुरस्कार’ वितरण सोहळ्यात ते बोलत होते. यावेळी महाराष्ट्र विधान परिषदेचे सभापती राम शिंदे, पर्यावरण व पशुसंवर्धन मंत्री पंकजा मुंडे, गोदरेज इंडस्ट्रीज लिमिटेडचे व्यवस्थापकीय संचालक तथा गोदरेज ॲग्रोव्हेट लिमिटेडचे अध्यक्ष नादिर गोदरेज, भामला फाउंडेशनचे संस्थापक आसिफ भामला, पंचशील रिअॅलिटीचे संस्थापक व अध्यक्ष अतुल चोरडिया, राज्यपालांचे सचिव डॉ. प्रशांत नारनवरे यांच्यासह विविध क्षेत्रांतील मान्यवर आणि पुरस्कारार्थी उपस्थित होते. राज्यपाल वर्मा म्हणाले, पर्यावरण हा आपल्याला मिळालेला वारसा आहे. वास्तू किंवा ऐतिहासिक वारसा जपतो त्याचप्रमाणे निसर्गाचाही वारसा समृद्ध करून पुढील पिढीकडे सोपविणे हे आपले कर्तव्य आहे. प्रगती करतांना आपली संस्कृती आणि परंपरा सोबत आवश्यक आहेत. भारतीय संस्कृतीमध्ये जंगलांना केवळ झाडे, पाने आणि प्राण्यांचे अधिवास म्हणून पाहिले गेले नाही, तर ज्ञानाचे भांडार म्हणून त्याकडे पाहिले गेले. निसर्गाचा वापर करायचा, मात्र त्याचे शोषण करायचे नाही, ही भारतीय जीवनपद्धतीची शिकवण असल्याचे राज्यपालांनी सांगितले. ईशान्य भारतातील जैवविविधतेचा उल्लेख करताना त्यांनी निसर्गाला पवित्र मानणाऱ्या आदिवासी संस्कृतीचे उदाहरण दिले. मेघालयातील पवित्र उपवने आणि नागालँडमधील पवित्र जंगले ही मानव आणि निसर्गातील सहजीवी नात्याची उदाहरणे आहेत. ‘अतिथी देवो भव’प्रमाणेच ‘प्रकृती देवो भव’ ही भावना अंगीकारण्याची गरज असल्याचे राज्यपाल म्हणाले. आज जगभरात अचानक येणारे महापूर, ढगफुटी, दुष्काळ यांसारख्या घटनांमध्ये वाढ होत आहे. नेपाळसह विविध ठिकाणी घडणाऱ्या नैसर्गिक आपत्ती आपल्याला सावध करतात. निसर्गाचे शोषण केले तर त्याची किंमत मोजावी लागते. निसर्ग जेव्हा उत्तर देतो, तेव्हा त्याच्यासाठी कोणीही लहान-मोठा नसतो. त्यामुळे स्वतःला सुरक्षित ठेवायचे असेल तर जंगल, जैवविविधता आणि संपूर्ण पर्यावरण सुरक्षित ठेवणे आवश्यक आहे, असे त्यांनी स्पष्ट केले. नागरिकांना पर्यावरणपूरक जीवनशैली स्वीकारण्यासाठी प्रेरित करणे आणि त्यासाठी आवश्यक संस्कृती निर्माण करणे गरजेचे आहे. संविधानाने दिलेल्या मूलभूत कर्तव्यांपैकी निसर्गाचे संरक्षण करणे, त्याचा विवेकपूर्ण वापर करणे आणि पुढील पिढ्यांसाठी चांगला वारसा निर्माण करणे हे अत्यंत महत्त्वाचे कर्तव्य आहे, असे राज्यपालांनी सांगितले. समाज आणि शासनाने एकत्रितपणे काम केल्यास पर्यावरण संवर्धनाला व्यापक यश मिळेल. सिंगल यूज प्लास्टिकच्या वापराविरोधातील प्रयत्नांचा संदर्भ देत त्यांनी केवळ आवाहन, दंड किंवा निरीक्षण पुरेसे नसून नागरिकांचा सक्रिय सहभाग आवश्यक असल्याचे त्यांनी सांगितले. पर्यावरणाच्या क्षेत्रात विशेषतः शासन आणि समाजाने एकत्रितपणे काम करण्याची गरज राज्यपाल महोदयांनी व्यक्त केली. पुण्यात करण्यात आलेल्या नाला सुशोभीकरण उपक्रमाचेही राज्यपालांनी कौतुक केले. तंत्रज्ञानाच्या मदतीने नाल्याचे रूपांतर सुंदर, स्वच्छ आणि नागरिकांसाठी उपयुक्त जागेत करता येते, हे या प्रकल्पातून दिसून येते. यामध्ये विक्रेत्यांसाठी जागा उपलब्ध करून देत त्यांच्या उपजीविकेचीही काळजी घेण्यात आली आहे, ही बाब समावेशक विकासाचे उत्तम उदाहरण असल्याचे त्यांनी सांगितले. विकासाच्या प्रक्रियेत समाजातील शेवटच्या घटकाचाही समावेश झाला पाहिजे, असे त्यांनी स्पष्ट केले. मुख्यमंत्री फडणवीस यांचे पर्यावरण संवर्धनासंदर्भात आवाहन मुख्यमंत्री देवेंद्र फडणवीस यांच्या पर्यावरण संवर्धनाच्या आवाहनाची चित्रफीत यावेळी दाखविण्यात आली. यात भामला फाउंडेशनच्या पर्यावरणविषयक कार्याचे कौतुक करत नागरिकांनी पर्यावरण रक्षणाच्या चळवळीत सक्रिय सहभाग घेण्याचे आवाहन मुख्यमंत्र्यांनी केले. दरवर्षी फाउंडेशनच्यावतीने पर्यावरणाच्या विविध प्रश्नांवर जनजागृती केली जाते. यंदा प्लास्टिकमुळे होणारे प्रदूषण, पर्यावरणाची हानी आणि मानवी आरोग्यावर होणारे दुष्परिणाम याबाबत जनजागृती केली जात आहे. प्लास्टिकचा वापर टाळून पर्यावरणपूरक पर्याय स्वीकारावे असे आवाहन श्री. फडणवीस यांनी केले. प्रत्येक नागरिकाचे छोटेसे योगदानही पर्यावरण संवर्धनाच्या व्यापक चळवळीला बळ देऊ शकते, असे त्यांनी सांगितले. पर्यावरण संरक्षण ही मोहीम नव्हे, संस्कृती बनली पाहिजे : प्रा. राम शिंदे पर्यावरण संवर्धन ही केवळ एखादी मोहीम न राहता ती आपल्या जीवनाचा आणि संस्कृतीचा भाग बनली पाहिजे. प्रत्येक नागरिकाने पर्यावरण रक्षणाची जबाबदारी स्वीकारून आपल्या दैनंदिन जीवनातून त्यासाठी योगदान देणे आवश्यक आहे, असे प्रतिपादन महाराष्ट्र विधान परिषदेचे सभापती प्रा. राम शिंदे यांनी केले. हवामान बदल हा भविष्यातील प्रश्न नसून आजच्या वर्तमानाचा प्रश्न आहे. वाढते तापमान, बदलते पावसाचे स्वरूप, जलसंकट आणि प्लास्टिक प्रदूषण यांचा परिणाम सर्वांवर होत आहे. त्यामुळे शासनाच्या प्रयत्नांसोबत नागरिकांचा सहभाग अत्यंत महत्त्वाचा आहे. एक नागरिक पाणी वाचवतो, एक कुटुंब वीज बचत करते, संस्था वृक्षारोपण करते किंवा उद्योग पर्यावरणपूरक पद्धती स्वीकारतो, अशा छोट्या-छोट्या प्रयत्नांतून मोठा बदल घडू शकतो, असे त्यांनी सांगितले. पर्यावरण संवर्धनाची चळवळ सामान्य नागरिकांचा सहभाग असलेली लोकचळवळ बनली पाहिजे, असेही प्रा. शिंदे यांनी नमूद केले. पर्यावरण वाचवणे म्हणजे निसर्गावर उपकार करणे नव्हे, तर आपल्या आणि पुढील पिढ्यांच्या भविष्यात गुंतवणूक करणे होय, असे सांगत त्यांनी पर्यावरण संवर्धनाला दैनंदिन जीवनशैलीचा भाग बनविण्याचे आवाहन केले. भारताच्या पारंपरिक जीवनपद्धतीत निसर्ग संवर्धनाला विशेष महत्त्व असून, पारंपरिक ज्ञानाची सांगड आधुनिक विज्ञान व तंत्रज्ञानाशी घालण्याची गरज आहे. निसर्गाकडून मिळालेला वारसा पुढील पिढीकडे अधिक समृद्ध स्वरूपात सोपविणे ही प्रत्येकाची जबाबदारी आहे. छोट्या-छोट्या पर्यावरणपूरक कृतींचे रूपांतर व्यापक लोकचळवळीत झाल्यास पर्यावरण संवर्धनाला निश्चितच नवी दिशा मिळेल, असा विश्वास प्रा.शिंदे यांनी व्यक्त केला. पर्यावरण संवर्धनासाठी प्रत्येकाचे छोटे योगदानही महत्त्वाचे : पर्यावरण मंत्री पंकजा मुंडे निसर्गाचा अमर्याद वापर आणि त्याचा होणारा ऱ्हास यामुळे विविध नैसर्गिक आपत्तींचे संकट वाढत आहे. त्यामुळे पर्यावरण संवर्धनासाठी प्रत्येक नागरिकाने आपले योगदान देणे आवश्यक आहे, असे आवाहन पर्यावरण व पशुसंवर्धन मंत्री पंकजा मुंडे यांनी केले. भामला फाउंडेशनच्या पर्यावरण संवर्धनाच्या कार्याचे कौतुक करताना, केवळ मोठ्या कार्यक्रमांपुरते पर्यावरण संवर्धन मर्यादित न ठेवता समाजातील विविध घटकांना सहभागी करून ग्रामीण भागातही पर्यावरणपूरक उपक्रम राबविण्याची गरज त्यांनी व्यक्त केली. वाढत्या काँक्रिटीकरणामुळे निसर्गाशी असलेले नाते दूर होत आहे. त्यामुळे विकासाची दिशा बदलून पुन्हा निसर्गाकडे वळण्याची गरज आहे. प्रत्येक छोट्या कृतीचे महत्त्व अधोरेखित करताना रोपवाटप, वृक्षलागवड, पाणी व वीज बचत, साधनसंपत्तीचा विवेकी वापर यांसारख्या कृती पर्यावरण संवर्धनासाठी महत्त्वपूर्ण असल्याचे मंत्री मुंडे म्हणाल्या. पर्यावरणासाठी थोडे थांबा, विचार करा आणि संवेदनशील बना असे आवाहन करतानाच छोटे-छोटे बदलच मोठ्या परिवर्तनाची सुरुवात ठरतात, असे श्रीमती मुंडे यांनी म्हणाल्या. यावेळी भामला फाउंडेशनच्यावतीने पर्यावरण संवर्धन क्षेत्रात उल्लेखनीय योगदान देणाऱ्या मान्यवरांचा ‘ग्रीन क्रुसेडर्स आणि अचिव्हर्स’ पुरस्काराने गौरव करण्यात आला. यामध्ये पुणे महानगरपालिकेचे आयुक्त नवल किशोर राम, जिल्हाधिकारी जितेंद्र डुडी, महेंद्र कल्याणकर, अभिनेते जॅकी श्रॉफ, पूनावाला समूहाचे प्रतिनिधी तसेच गोदरेज इंडस्ट्रीजचे व्यवस्थापकीय संचालक व गोदरेज ॲग्रोव्हेटचे अध्यक्ष नादिर गोदरेज यांच्यासह विविध क्षेत्रांतील मान्यवरांचा समावेश होता. भामला फाउंडेशनचे अध्यक्ष आसिफ भामला यांनी प्रास्ताविकातून संस्थेच्या पर्यावरण संवर्धनाच्या कार्याचा आढावा घेतला. नागरिकांचा सक्रिय सहभाग वाढवून पर्यावरण संवर्धनाची चळवळ अधिक व्यापक करण्याचा संस्थेचा प्रयत्न असल्याचे त्यांनी सांगितले.

Ram Shinde : राज्यपाल जिष्णु देव वर्मा यांच्या हस्ते ‘ग्रीन क्रुसेडर्स आणि अचिव्हर्स पुरस्कार’ वितरण Read More »

Fire Safety Drill : कॉलेज ऑफ नर्सिंगमध्ये अग्निशमन आपत्ती प्रात्यक्षिक सरावाचे आयोजन

Leave a Comment / ऑटोमोबाईल, ट्रेंडिंग, ताज्या बातम्या, हायलाईट / dnamarathi.com

Fire Safety Drill : डॉ. विठ्ठलराव विखे पाटील फौंडेशनच्या कॉलेज ऑफ नर्सिंग, अहिल्यानगर येथे समुदाय आरोग्य परिचर्या विभागाच्या वतीने बी.एस्सी. नर्सिंगच्या विद्यार्थ्यांसाठी अग्निशमन आपत्ती प्रात्यक्षिक सराव (Fire Disaster Mock Drill) आयोजित करण्यात आला. विद्यार्थ्यांमध्ये अग्निसुरक्षेबाबत जागरूकता निर्माण करणे, तसेच आपत्कालीन परिस्थिती आणि आपत्ती व्यवस्थापनासाठी आवश्यक कौशल्ये विकसित करणे हा या उपक्रमाचा मुख्य उद्देश होता. या प्रात्यक्षिक सरावामुळे विद्यार्थ्यांना आगीसारख्या आपत्कालीन परिस्थितीत तत्परतेने, प्रभावीपणे आणि सुरक्षितपणे प्रतिसाद देण्याचा प्रत्यक्ष अनुभव मिळाला. विद्यार्थ्यांची आपत्कालीन परिस्थितीतील तयारी, आत्मविश्वास आणि व्यावसायिक क्षमता वाढविण्याच्या सातत्यपूर्ण प्रयत्नांचा एक भाग म्हणून या उपक्रमाचे आयोजन करण्यात आले. आपत्ती किंवा आपत्कालीन परिस्थिती कोणत्याही वेळी उद्भवू शकते. अशा वेळी रुग्णांची सुरक्षितता सुनिश्चित करणे, तातडीने प्राथमिक उपचार देणे, सुरक्षित स्थलांतर करणे, आपत्कालीन पथकांशी समन्वय साधणे आणि आवश्यक वैद्यकीय मदत उपलब्ध करून देणे, यामध्ये परिचारिकांची भूमिका अत्यंत महत्त्वाची असते. ही बाब लक्षात घेऊन विद्यार्थ्यांना केवळ सैद्धांतिक ज्ञान न देता प्रत्यक्ष कृतीवर आधारित प्रशिक्षण देण्यात आले. प्रात्यक्षिक सरावादरम्यान विद्यार्थ्यांना अग्निसुरक्षेची मूलभूत तत्त्वे, आपत्कालीन प्रतिसाद, सुरक्षित स्थलांतर प्रक्रिया आणि आपत्ती व्यवस्थापन याबाबत मार्गदर्शन करण्यात आले. आग लागल्याची माहिती मिळाल्यानंतर तातडीने अलार्म देणे, संबंधित अधिकाऱ्यांना माहिती देणे, नागरिक व रुग्णांचे सुरक्षित स्थलांतर करणे, घाबरून न जाता शांतपणे परिस्थिती हाताळणे आणि बाधित व्यक्तींना तातडीने प्राथमिक उपचार देणे, याबाबत प्रत्यक्ष प्रात्यक्षिकाद्वारे प्रशिक्षण देण्यात आले. या मॉक ड्रिलमध्ये बाधित व्यक्तींना रुग्णवाहिकेद्वारे सुरक्षितपणे रुग्णालयात हलविणे आणि रुग्णालयात आवश्यक आपत्कालीन उपचार उपलब्ध करून देण्याच्या प्रक्रियेचाही समावेश करण्यात आला. सुरुवातीच्या आपत्कालीन प्रतिसादापासून सुरक्षित स्थलांतर, रुग्णवाहिकेद्वारे वाहतूक आणि आपत्कालीन वैद्यकीय उपचारापर्यंतच्या विविध टप्प्यांचा विद्यार्थ्यांनी प्रत्यक्ष अनुभव घेतला. त्यामुळे आपत्कालीन परिस्थितीत वेळेवर उपचार तसेच विविध विभागांमधील प्रभावी समन्वयाचे महत्त्व विद्यार्थ्यांना समजले. विद्यार्थ्यांनी या प्रात्यक्षिक सरावात उत्स्फूर्त सहभाग घेत आपत्ती व्यवस्थापनाशी संबंधित विविध कौशल्यांचे प्रदर्शन केले. या उपक्रमातून संघभावना, प्रभावी संवाद, नेतृत्वगुण, तत्पर निर्णयक्षमता तसेच आरोग्यसेवा कर्मचारी, सुरक्षा कर्मचारी आणि सहाय्यक पथकांमधील समन्वयाचे महत्त्व अधोरेखित झाले. या प्रात्यक्षिकामुळे विद्यार्थ्यांना आपत्कालीन परिस्थितीत स्वतःची तसेच रुग्णांची सुरक्षितता कशी राखावी, संभाव्य धोके कसे ओळखावेत आणि परिस्थितीला नियोजनबद्ध पद्धतीने कसा प्रतिसाद द्यावा, याबाबत आत्मविश्वास मिळाला. सैद्धांतिक ज्ञान आणि प्रत्यक्ष कृती यांच्यातील दुवा निर्माण करण्यासाठी हा उपक्रम अत्यंत उपयुक्त ठरला. या अग्निशमन आपत्ती प्रात्यक्षिक सरावाच्या यशस्वी आयोजनासाठी महाविद्यालयाच्या व्यवस्थापनाचे विशेष आभार व्यक्त करण्यात आले. प्रा. डॉ. अभिजित दिवटे, संचालक (वैद्यकीय) यांचे मोलाचे मार्गदर्शन लाभले. तसेच डॉ. सतीश मोरे, वैद्यकीय अधीक्षक, डॉ. विखे पाटील मेमोरियल हॉस्पिटल; डॉ. मयुरी वाळुंज, कॅज्युअल्टी ऑफिसर (अपघात व आपत्कालीन विभाग अधिकारी) आणि श्री. आंबोरे, सुरक्षा अधिकारी यांचे सहकार्य व मोलाच्या योगदानाबद्दल विशेष आभार व्यक्त करण्यात आले. हा कार्यक्रम प्रा. डॉ. प्रतिभा चांदेकर, प्राचार्य आणि प्रा. डॉ. योगिता औताडे, उपप्राचार्य तथा विभागप्रमुख, समुदाय आरोग्य परिचर्या विभाग यांच्या नेतृत्वाखाली आयोजित करण्यात आला. सर्व विभागप्रमुख, शिक्षकवृंद आणि शिक्षकेतर कर्मचाऱ्यांच्या सातत्यपूर्ण मार्गदर्शन, प्रोत्साहन आणि सहकार्यामुळे विद्यार्थ्यांनी या महत्त्वपूर्ण उपक्रमात उत्स्फूर्त सहभाग घेतला. अग्निशमन आपत्ती प्रात्यक्षिकाच्या यशस्वी आयोजनासाठी प्रा. अमोल टेमकर, प्रा. अमित कडू, सहयोगी प्राध्यापक निलेश म्हस्के, राहुल कडू, विशाल पुलाटे आणि श्री. प्रशांत अम्ब्रीत यांनी मॉक ड्रिलचे प्रभावी समन्वय व आयोजन केले. अग्निशमन आपत्ती प्रात्यक्षिक सराव हा बी.एस्सी. नर्सिंगच्या विद्यार्थ्यांसाठी अत्यंत उपयुक्त, ज्ञानवर्धक आणि अनुभवसमृद्ध उपक्रम ठरला. या उपक्रमामुळे विद्यार्थ्यांमध्ये अग्निसुरक्षा, आपत्ती व्यवस्थापन आणि आपत्कालीन परिस्थितीतील प्रतिसाद याबाबत जागरूकता वाढली. त्याचबरोबर अशा परिस्थितीत आवश्यक असणारी व्यावहारिक कौशल्ये, आत्मविश्वास, जबाबदारीची भावना आणि व्यावसायिक दृष्टिकोन विकसित होण्यास मदत झाली. भविष्यातील परिचारिका म्हणून विद्यार्थ्यांना आपत्कालीन व आपत्तीजन्य परिस्थितीत सक्षमपणे कार्य करता यावे आणि रुग्ण तसेच समाजाच्या सुरक्षिततेसाठी प्रभावी योगदान देता यावे, यासाठी प्रत्यक्ष अनुभवावर आधारित प्रशिक्षण उपक्रमांचे आयोजन महत्त्वपूर्ण आहे. विद्यार्थ्यांच्या सर्वांगीण व्यावसायिक विकासासोबतच गुणवत्तापूर्ण आणि सुरक्षित आरोग्यसेवा देण्यासाठी महाविद्यालयाची ही वचनबद्धता निश्चितच कौतुकास्पद आहे.

Fire Safety Drill : कॉलेज ऑफ नर्सिंगमध्ये अग्निशमन आपत्ती प्रात्यक्षिक सरावाचे आयोजन Read More »

Iran Amrica War : महिनाभरानंतर अमेरिका-इराण संघर्ष पुन्हा पेटला; अमेरिकेचा इराणवर हल्ला, इराणकडूनही प्रत्युत्तर

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Iran Amrica War : अमेरिका आणि इराण यांच्यातील संघर्ष पुन्हा एकदा चिघळला आहे. जवळपास महिनाभराच्या तुलनेने शांततेनंतर अमेरिकेने इराणवर पुन्हा लष्करी कारवाई केली. अमेरिकेने इराणच्या लारक बेटावरील दोन रॉकेट लाँचर्सवर हल्ला केला. या हल्ल्यानंतर इराणनेही अमेरिकेला प्रत्युत्तर देत जॉर्डनमधील अमेरिकी लष्करी तळांना बॅलिस्टिक मिसाईलने लक्ष्य केल्याचा दावा केला आहे. अमेरिकेने इराणवर हल्ला का केला? अमेरिकेच्या म्हणण्यानुसार, इराणच्या इस्लामिक रिव्होल्युशनरी गार्ड कॉर्प्सचे (IRGC) जवान होर्मुझच्या सामुद्रधुनीत समुद्री सुरुंग आणि रॉकेट तैनात करण्याच्या तयारीत होते. होर्मुझची सामुद्रधुनी ही जगातील सर्वात महत्त्वाच्या समुद्री मार्गांपैकी एक आहे. आखाती देशांमधून मोठ्या प्रमाणात तेल आणि इतर ऊर्जा उत्पादने या मार्गाने जगभर पोहोचतात. त्यामुळे या भागात समुद्री सुरुंग तैनात झाल्यास जहाजांच्या वाहतुकीला मोठा धोका निर्माण होऊ शकतो. अमेरिकेच्या सेंट्रल कमांडने या कारवाईला मर्यादित आणि अचूक लष्करी कारवाई म्हटले आहे. अमेरिकेचा दावा आहे की, संभाव्य धोका टाळण्यासाठी ही कारवाई करण्यात आली. इराणने दिले अमेरिकेला प्रत्युत्तर अमेरिकेच्या हल्ल्यानंतर इराणच्या रिव्होल्युशनरी गार्ड्सने प्रत्युत्तर देण्याची घोषणा केली. त्यानंतर इराणने जॉर्डनमधील दोन अमेरिकी लष्करी तळांना लक्ष्य करून बॅलिस्टिक मिसाईल डागल्याचे सांगितले. इराणच्या माहितीनुसार, किंग हुसेन आणि अल-अझराक या अमेरिकी लष्करी तळांना लक्ष्य करण्यात आले. इराणने या कारवाईला आक्रमणाचा बदला म्हणून वर्णन केले आहे. इराणच्या रिव्होल्युशनरी गार्ड्सने या हल्ल्यात लष्करी तळांवरील तांत्रिक आणि दुरुस्ती सुविधांसह लढाऊ विमानांच्या तैनातीच्या ठिकाणांना नुकसान झाल्याचा दावा केला आहे. मात्र, या दाव्यांची स्वतंत्रपणे पूर्ण पुष्टी झालेली नाही. जॉर्डनने आठ मिसाईल हवेतच रोखली इराणकडून मिसाईल डागण्यात आल्यानंतर जॉर्डनच्या हवाई संरक्षण यंत्रणेने कारवाई केली. जॉर्डनच्या लष्कराने आठ मिसाईल हवेतच रोखल्याचे सांगितले आहे. या हल्ल्यात कोणतीही जीवितहानी झाल्याचे तातडीने समोर आलेले नाही. मात्र, या घटनेमुळे जॉर्डनसह संपूर्ण मध्यपूर्वेत पुन्हा तणाव वाढला आहे. होर्मुझची सामुद्रधुनी एवढी महत्त्वाची का? होर्मुझची सामुद्रधुनी ही जगातील तेल वाहतुकीसाठी अत्यंत महत्त्वाची आहे. आखाती देशांमधून होणाऱ्या तेलाच्या वाहतुकीचा मोठा भाग या अरुंद समुद्री मार्गातून जातो. या भागात युद्धजन्य परिस्थिती निर्माण झाली किंवा जहाजांची वाहतूक थांबली, तर त्याचा परिणाम केवळ अमेरिका आणि इराणपुरता मर्यादित राहणार नाही. जगभरातील तेलाच्या किमती वाढू शकतात आणि महागाईचा दबाव वाढू शकतो. अमेरिका आणि इराणमधील ताज्या संघर्षानंतर तेलाच्या बाजारातही अस्थिरता दिसून आली असून, ब्रेंट क्रूडची किंमत पुन्हा 90 डॉलरच्या वर गेल्याचे वृत्त आहे. महिनाभरानंतर पुन्हा थेट संघर्ष अमेरिका आणि इराणमध्ये गेल्या काही महिन्यांपासून संघर्ष सुरू आहे. मात्र, जुलैच्या अखेरीपासून दोन्ही देशांमध्ये थेट लष्करी हल्ल्यांमध्ये काही काळाची शांतता होती. आता लारक बेटावरील अमेरिकी हल्ला आणि त्यानंतर जॉर्डनमधील अमेरिकी तळांवर इराणचा मिसाईल हल्ला यामुळे दोन्ही देशांमधील थेट संघर्ष पुन्हा सुरू झाल्याचे चित्र आहे. पुढे काय होणार? सध्याची परिस्थिती अत्यंत संवेदनशील आहे. अमेरिकेने इराणची लष्करी कारवाई रोखण्यासाठी पुन्हा हल्ले सुरू केले, तर इराणनेही अमेरिकी तळांवर प्रत्युत्तर देण्याची भूमिका घेतली आहे. त्यामुळे संघर्ष आणखी वाढल्यास जॉर्डन, आखाती देश आणि होर्मुझच्या सामुद्रधुनीतील व्यापारी जहाजांच्या सुरक्षेवर परिणाम होण्याची शक्यता आहे. याचा सर्वात मोठा परिणाम तेलाच्या पुरवठ्यावर होऊ शकतो. त्यामुळे अमेरिका-इराण संघर्षाकडे केवळ दोन देशांमधील युद्ध म्हणून न पाहता, संपूर्ण मध्यपूर्व आणि जागतिक अर्थव्यवस्थेवर परिणाम करणारे संकट म्हणून पाहिले जात आहे.

Iran Amrica War : महिनाभरानंतर अमेरिका-इराण संघर्ष पुन्हा पेटला; अमेरिकेचा इराणवर हल्ला, इराणकडूनही प्रत्युत्तर Read More »

Kirit Somaiya : हिंदू मंदिरांजवळ बांंग्लादेशी मुस्लिम माफियांची अतिक्रमणे; किरीट सोमय्या यांचा गंभीर आरोप

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Kirit Somaiya : महाराष्ट्रात अनेक हिंदू मंदिरांजवळ बांग्लादेशी मुस्लिम माफिया, ड्रग माफिया, फेरीवाले कब्जा घेतात. अडथळे निर्माण करतात. नेवासे येथील घटनाही त्यातील एक भाग आहे. मला याचा राग आला. मी जिल्हा प्रशासनाकडे संताप व्यक्त केला आहे. ठरवून मुस्लिम अतिक्रमणे सुरू आहेत, असे मत भाजपचे माजी खासदार किरीट सोमय्या ( Kirit Somaiya ) यांनी व्यक्त केले. भाजपचे माजी खासदार किरीट सोमय्या यांनी काल (ता. ३०) नेवासे येथे जाणून पैस खांब मंदिराला भेट देत दर्शन घेतले. त्यानंतर नागरिकांनी त्यांना मंदिर परिसरातील अतिक्रमणांबाबत निवेदन दिले. या संदर्भात त्यांनी पोलीस प्रशासनाकडे मागणी केली. या घटनाक्रमाची माहिती त्यांनी प्रसार माध्यमांना देताना हे वक्तव्य केले. ते पुढे म्हणाले की, नगरपालिकेने सरकारी कामात अडथळ्याबाबत तक्रार केली नाही. पोलिसांनीही ज्याला मारहाण झाली त्याची केवळ तक्रार घेतली, स्वतः काहीच केले नाही. म्हणून मी पोलीस व नगरपालिकेला २४ तासांचा इशारा दिला आहे. २४ तासांत सरकारी कामात अडथळा, सरकारी अधिकाऱ्यांना धक्काबुक्की, छेडछाड हे गुन्हे दाखल झाले पाहिजेत. या मागील माफिया किंगवर कारवाई झाली पाहिजे, अशी मागणी त्यांनी केली. २४ तासांनंतर येथे एक जरी मुस्लिम बांग्लादेशी फेरीवाला बसला तर त्याला नगरपालिका व पोलीस प्रशासनाला जाब द्यावा लागेल. अनेक वर्षांपासून दंगे होतील, अशी शासन-प्रशासनात प्रवृत्ती तयार झाली आहे. मुंबईतही पोलिसांनी अशीच नौटंकी केली. हे आम्हा आता सहन करणार नाही. मुस्लिम फेरीवाल्यांनी हिंदू भक्तांना मारहाण केली, त्यावेळी पोलिसांनी बोटचेपीची भूमिका का घेतली, याबाबत मी पोलीस प्रशासनाला जाब विचारला आहे, असे त्यांनी सांगितले. जर नेवासे येथील मंदिर परिसरातील अतिक्रमणांवर कारवाई झाली नाही तर मी स्वतः मंदिर परिसरात येऊन आंदोलन करणार आहे. मंदिर परिसरात एकही मुस्लिम फेरीवाला, बांग्लादेशी माफिया दिसता कामा नये, असे त्यांनी ठणकावून सांगितले.

Kirit Somaiya : हिंदू मंदिरांजवळ बांंग्लादेशी मुस्लिम माफियांची अतिक्रमणे; किरीट सोमय्या यांचा गंभीर आरोप Read More »

Vitthalrao Vikhe Patil Foundation : ज्ञानसरिता विद्यालयात शालेय आरोग्य व किशोरवयीन आरोग्य जनजागृती कार्यक्रम

Leave a Comment / आरोग्य, ट्रेंडिंग, ताज्या बातम्या, हायलाईट / dnamarathi.com

Vitthalrao Vikhe Patil Foundation : डॉ. विठ्ठलराव विखे पाटील फाउंडेशनच्या कॉलेज ऑफ नर्सिंगच्या समुदाय आरोग्य परिचर्या विभागाच्या वतीने, डॉ. विखे पाटील मेमोरियल हॉस्पिटल आणि रोटरी क्लब ऑफ अहमदनगर सेंट्रल यांच्या सहकार्याने वडगाव गुप्ता येथील ज्ञानसरिता विद्यालयात शालेय आरोग्य तपासणी व किशोरवयीन आरोग्य जनजागृती कार्यक्रमाचे आयोजन करण्यात आले. विद्यार्थ्यांमध्ये आरोग्यविषयक जागरूकता निर्माण करणे, प्रतिबंधात्मक आरोग्यसेवेचे महत्त्व समजावून देणे, वैयक्तिक स्वच्छता, योग्य पोषण, निरोगी जीवनशैली तसेच किशोरवयीन आरोग्याबाबत योग्य माहिती देणे हा या उपक्रमाचा प्रमुख उद्देश होता. कार्यक्रमांतर्गत विद्यार्थ्यांची सर्वसमावेशक आरोग्य तपासणी करण्यात आली. तपासणीदरम्यान आढळलेल्या सामान्य आरोग्य समस्या तसेच किशोरवयीन वयातील आरोग्यविषयक अडचणींबाबत विद्यार्थ्यांना आवश्यक मार्गदर्शन व समुपदेशन करण्यात आले. यावेळी विविध आरोग्यविषयक विषयांवर पोस्टर प्रदर्शन, प्रात्यक्षिके आणि जनजागृतीपर स्किट सादर करण्यात आले. मासिक पाळीचे आरोग्य व व्यवस्थापन, गुड टच-बॅड टच, स्व-स्तन तपासणी व लवकर निदानाचे महत्त्व, तोंडाचा व गर्भाशयाच्या मुखाचा कर्करोग प्रतिबंध व तपासणी, योग्य पोषण, वैयक्तिक स्वच्छता, निरोगी जीवनशैली आणि किशोरवयीन मुलींमध्ये आढळणाऱ्या सामान्य आरोग्य समस्यांबाबत विद्यार्थ्यांना सोप्या व प्रभावी पद्धतीने माहिती देण्यात आली. संवेदनशील आरोग्यविषयक विषय विद्यार्थ्यांना त्यांच्या वयोगटाला अनुरूप पद्धतीने समजावून सांगण्यात आल्याने विद्यार्थ्यांनीही या उपक्रमाला उत्स्फूर्त प्रतिसाद दिला. आरोग्यविषयक समस्या उद्भवल्यास वेळ न दवडता वैद्यकीय सल्ला घेण्याबरोबरच दैनंदिन जीवनात आरोग्यदायी सवयी अंगीकारण्याचे आवाहन यावेळी करण्यात आले. या कार्यक्रमास रोटरी क्लब ऑफ अहमदनगर सेंट्रलचे अध्यक्ष अमर गुरव आणि CSR सुनील कटारिया यांची प्रमुख उपस्थिती होती. त्यांच्या उपस्थिती व सहकार्यामुळे विद्यार्थ्यांमध्ये आरोग्यविषयक जनजागृती करण्याच्या उपक्रमाला प्रोत्साहन मिळाले. कार्यक्रमाच्या यशस्वी आयोजनासाठी महाविद्यालयाचे व्यवस्थापन व संबंधित अधिकाऱ्यांचे मार्गदर्शन लाभले. प्रा. डॉ. अभिजित दिवटे, संचालक (मेडिकल) तसेच डॉ. सतीश मोरे, वैद्यकीय अधीक्षक यांचे विशेष मार्गदर्शन व सहकार्य लाभले. तसेच डॉ. अपूर्वा देशमुख, रेसिडेंट स्त्रीरोगतज्ज्ञ आणि डॉ. ऐश्वर्या तळवलकर, ज्युनिअर रेसिडेंट, बालरोगतज्ज्ञ यांनी विशेष सहकार्य केले. कार्यक्रमाचे आयोजन प्रा. डॉ. प्रतिभा चांदेकर, प्राचार्य तसेच प्रा. डॉ. योगिता औताडे, उपप्राचार्य व विभागप्रमुख, समुदाय आरोग्य परिचर्या विभाग यांच्या मार्गदर्शनाखाली करण्यात आले. यावेळी शाळेचे प्राचार्य सुंबे सर यांचा सत्कार करण्यात आला. कार्यक्रमाच्या यशस्वी आयोजनासाठी अमोल अनप, दिनेश मगर, कु. प्रिती कडू आणि कु. स्नेहल घोडेकर यांनी समन्वय साधला. आरोग्य तपासणी, आरोग्य शिक्षण, पोस्टर प्रदर्शन, प्रात्यक्षिके आणि स्किटच्या माध्यमातून विद्यार्थ्यांमध्ये आरोग्य समस्या लवकर ओळखणे, वेळेवर तपासणी करणे आणि आवश्यकतेनुसार वैद्यकीय सेवा घेणे याबाबत सकारात्मक दृष्टिकोन निर्माण झाला. शाळा प्रशासन व विद्यार्थ्यांच्या उत्स्फूर्त प्रतिसादामुळे हा उपक्रम प्रभावी ठरला.

Vitthalrao Vikhe Patil Foundation : ज्ञानसरिता विद्यालयात शालेय आरोग्य व किशोरवयीन आरोग्य जनजागृती कार्यक्रम Read More »

AFG vs IND : अफगाणिस्तानविरुद्धच्या टी-20 मालिकेसाठी टीम इंडियात ‘या’ खेळाडूंना मिळणार संधी

Leave a Comment / ट्रेंडिंग, ताज्या बातम्या, स्पोर्ट्स, हायलाईट / dnamarathi.com

AFG vs IND : आशिया कप आणि आगामी आंतरराष्ट्रीय सामन्यांच्या पार्श्वभूमीवर टीम इंडियाच्या पुढील टी-20 मालिकेकडे क्रिकेट चाहत्यांचे लक्ष लागले आहे. भारत आणि अफगाणिस्तान यांच्यात सप्टेंबरमध्ये तीन सामन्यांची टी-20 मालिका होणार असल्याचे वृत्त आहे. मालिकेतील सामने 13, 15 आणि 17 सप्टेंबर 2026 रोजी खेळवले जाण्याची शक्यता आहे. या मालिकेसाठी भारतीय संघाची अधिकृत घोषणा अद्याप झालेली नसताना संभाव्य संघाबाबत चर्चा सुरू झाली आहे. कोणाला मिळू शकते संधी? संभाव्य संघात अभिषेक शर्मा, संजू सॅमसन, ईशान किशन, जसप्रीत बुमराह यांसारख्या प्रमुख खेळाडूंचा समावेश होऊ शकतो. संभाव्य संघाची चर्चा करताना फलंदाजीसोबतच गोलंदाजी विभागातही अनुभवी आणि युवा खेळाडूंचा समतोल साधण्याचा प्रयत्न केला जाऊ शकतो. अफगाणिस्तानचा संघ जाहीर दरम्यान, अफगाणिस्तान क्रिकेट बोर्डाने भारताविरुद्धच्या तीन सामन्यांच्या टी-20 मालिकेसाठी 15 सदस्यीय संघ जाहीर केला आहे. इब्राहिम झद्रानकडे टी-20 संघाचे पूर्णवेळ कर्णधारपद सोपवण्यात आले आहे. दुखापतीनंतर वेगवान गोलंदाज नवीन-उल-हकचे संघात पुनरागमन झाले आहे. अफगाणिस्तानच्या संघात राशिद खान, रहमानुल्लाह गुरबाज, नूर अहमद, मोहम्मद नबी, गुलबदीन नायब, मुजीब उर रहमान, फजलहक फारुकी आणि अजमतुल्लाह उमरझाई यांसारख्या अनुभवी खेळाडूंचा समावेश आहे. आगामी स्पर्धांच्या तयारीच्या दृष्टीने ही मालिका दोन्ही संघांसाठी महत्त्वाची ठरणार आहे. भारताला आपल्या टी-20 संघातील पर्याय तपासण्याची संधी मिळेल, तर अफगाणिस्तानचा संघ राशिद खानसह आपल्या प्रमुख खेळाडूंच्या जोरावर भारताला आव्हान देण्याचा प्रयत्न करेल. मात्र टीम इंडियाचा अंतिम संघ BCCI कडून जाहीर झाल्यानंतरच कोणत्या खेळाडूंना प्रत्यक्ष संधी मिळणार हे स्पष्ट होईल.

AFG vs IND : अफगाणिस्तानविरुद्धच्या टी-20 मालिकेसाठी टीम इंडियात ‘या’ खेळाडूंना मिळणार संधी Read More »

Manoj Jarange: जरांगे पाटलांचे निर्णायक उपोषण सुरू; मागण्या पूर्ण होईपर्यंत माघार नाही, सरकारला इशारा

Leave a Comment / ट्रेंडिंग, ताज्या बातम्या, राजकीय, हायलाईट / dnamarathi.com

Manoj Jarange : मराठा आरक्षणाच्या मागणीसाठी मनोज जरांगे पाटील यांनी दिलेल्या शब्दाप्रमाणे आज सकाळी 10 वाजता आमरण उपोषणाला सुरुवात केली. हे आपले निर्णायक आणि शेवटचे आमरण उपोषण असल्याचे जरांगे पाटील यांनी पत्रकार परिषदेत स्पष्ट केले. मागण्या पूर्ण होईपर्यंत आंदोलन मागे घेणार नसल्याचा निर्धार त्यांनी व्यक्त केला. उद्यापासून बोलणे शक्य होणार नाही, त्यामुळे आजच समाजाशी संवाद साधत असल्याचे जरांगे पाटील म्हणाले. मराठा समाजाने मोठ्या संख्येने अंतरवाली सराटीत दाखल व्हावे आणि आंदोलनात सहभागी व्हावे, असे आवाहनही त्यांनी केले. 58 लाख कुणबी नोंदींच्या आधारे प्रमाणपत्रांची मागणी शिंदे समितीला सापडलेल्या 58 लाख कुणबी नोंदींच्या आधारे तत्काळ कुणबी प्रमाणपत्रांचे वाटप करण्यात यावे, अशी प्रमुख मागणी जरांगे पाटील यांनी केली. गावागावातील पात्र बांधवांना कुणबी प्रमाणपत्र मिळाल्याचे स्पष्ट होईपर्यंत आंदोलन मागे घेणार नसल्याचे त्यांनी सांगितले. ज्यांच्या कुणबी नोंदी सापडल्या आहेत, मात्र अद्याप प्रमाणपत्र मिळालेले नाही, त्यांनी अंतरवाली सराटीत यावे, असे आवाहन त्यांनी केले. तसेच ज्यांनी प्रमाणपत्रासाठी अर्ज केला आहे, पण तो स्वीकारण्यात आलेला नाही, अशांनीही अंतरवालीत यावे, असे त्यांनी सांगितले. कुणबी प्रमाणपत्र मिळाले आहे, मात्र जात वैधता प्रमाणपत्र मिळालेले नाही, अशांनीही आपापल्या नोंदी घेऊन अंतरवाली सराटीत यावे, असे जरांगे पाटील यांनी म्हटले. संबंधितांकडून अर्ज स्वीकारण्याची व्यवस्था करण्याचे आवाहनही त्यांनी केले. ‘कुणबी प्रमाणपत्र पुरेसे नाही, जात वैधता कशी देणार?’ केवळ कुणबी प्रमाणपत्र देऊन प्रश्न सुटणार नाही, तर जात वैधता प्रमाणपत्र कसे दिले जाणार? याची स्पष्ट माहिती सरकारने द्यावी, अशी मागणी जरांगे पाटील यांनी केली. ज्यांना कुणबी प्रमाणपत्र मिळाले आहे, त्यांच्या जात वैधतेचा प्रश्न तातडीने सोडवावा आणि पात्र असलेल्या सर्व प्रकरणांची वैधता करावी, अशी त्यांची भूमिका आहे. हैदराबाद गॅझेटमधील नोंदींच्या आधारे मराठा समाजाला कुणबी प्रमाणपत्रे देण्याची प्रक्रिया आजपासून सुरू करावी आणि त्यानंतर जात वैधता कशी केली जाणार, याची स्पष्ट कार्यपद्धती सरकारने जाहीर करावी, असे ते म्हणाले. ‘फक्त प्रमाणपत्र देण्याचे आश्वासन मान्य नाही त्याच्या वैधतेबाबतही स्पष्ट अंमलबजावणी हवी,’ असा इशारा त्यांनी दिला. सातारा, कोल्हापूर आणि औंध संस्थांच्या जीआरची मागणी सातारा संस्था, कोल्हापूर संस्था आणि औंध संस्थांबाबतचे जीआर तातडीने काढून त्याची अंमलबजावणी करावी, अशी मागणीही त्यांनी केली. या संस्थांच्या माध्यमातून मिळणाऱ्या लाभांसाठी जात वैधता कशी केली जाणार, हेही सरकारने स्पष्ट करावे, असे ते म्हणाले. केवळ जीआर काढून पुन्हा समाजाची फसवणूक करू नये. यापूर्वी मागण्या मान्य करण्यात आल्या, मात्र त्यांची प्रत्यक्ष अंमलबजावणी झाली नाही, असा आरोप जरांगे पाटील यांनी केला. ‘करू, करू’ म्हणता म्हणता 75 वर्षे गेली, अशी टीकाही त्यांनी सरकारवर केली. ‘सरकारवर पूर्णपणे भरोसा ठेवू नका’ मराठा समाजाने यापुढे सरकारवर पूर्णपणे भरोसा ठेवणे बंद करावे, असे आवाहन जरांगे पाटील यांनी केले. ‘आपला पक्ष, आपला नेता कोणीही नाही; या जगात फक्त जात आपली आहे,’ असे ते म्हणाले. गेल्या तीन वर्षांपासून सुरू असलेला लढा आता विजयाच्या उंबरठ्यावर असल्याचा दावा त्यांनी केला. ही शेवटची फाईट असून गाफील राहू नका, दगाफटका होऊ शकतो, असा इशाराही त्यांनी समाजाला दिला. ‘मी तुमच्या लेकराबाळांसाठी जीव द्यायला तयार’ मराठा समाजाने अंतरवाली सराटीकडे मोठ्या संख्येने धावून यावे, असे भावनिक आवाहन जरांगे पाटील यांनी केले. ‘सगळ्यांनी बाहेर पडा, मी तुमच्या लेकराबाळांसाठी जीव द्यायला तयार आहे,’ असे ते म्हणाले. सलग तीन वर्षे मुलांच्या भविष्यासाठी लढत असल्याचे सांगत त्यांनी आंदोलनात मोठ्या संख्येने सहभागी होण्याचे आवाहन केले. कुटुंबातील एखाद्या व्यक्तीला त्रास झाल्यानंतर आपण जसे धावून जातो, तसेच अंतरवाली सराटीकडे धावून या, असेही त्यांनी म्हटले. SEBC-EWS मधील नियुक्त्यांवरही ठाम भूमिका SEBC आणि EWSमधून निवड झालेल्यांना नियुक्त्या मिळेपर्यंत आंदोलन थांबवणार नाही, अशी भूमिका जरांगे पाटील यांनी घेतली. तसेच महामंडळाचे सर्व परतावे देण्याची मागणीही त्यांनी केली. एकूणच, कुणबी प्रमाणपत्रांसोबत जात वैधता, सातारा-कोल्हापूर-औंध संस्थांचे जीआर, SEBC-EWS मधील नियुक्त्या आणि महामंडळाच्या परताव्यांसह विविध मागण्यांवर सरकारने ठोस निर्णय घ्यावा, अशी भूमिका घेत जरांगे पाटील यांनी आपले उपोषण निर्णायक असल्याचे स्पष्ट केले आहे.

Manoj Jarange: जरांगे पाटलांचे निर्णायक उपोषण सुरू; मागण्या पूर्ण होईपर्यंत माघार नाही, सरकारला इशारा Read More »

Ahilyanagar Crime: तहसील कार्यालयात गोळ्यांचा थरार; अॅड. रियाज पठाण हत्या प्रकरणात 7 जणांना मरेपर्यंत जन्मठेप

Leave a Comment / ऑटोमोबाईल, ट्रेंडिंग, ताज्या बातम्या, हायलाईट / dnamarathi.com

Ahilyanagar Crime: नेवासा तहसील कार्यालयाच्या आवारात भरदिवसा गोळ्या झाडून अॅड. रियाज पठाण यांची हत्या करणाऱ्या सात आरोपींना अखेर न्यायालयाने कठोर शिक्षा सुनावली आहे. तब्बल १३ वर्षांपासून गाजत असलेल्या या बहुचर्चित खून खटल्यात प्रमुख जिल्हा व सत्र न्यायाधीश एस. बी. कचरे यांनी सातही दोषींना मरेपर्यंत जन्मठेप आणि दंडाची शिक्षा सुनावली. तर सबळ पुराव्याअभावी पाच आरोपींची निर्दोष मुक्तता करण्यात आली. विशेष सरकारी वकील अॅड. उज्ज्वल निकम यांनी केलेला प्रभावी युक्तिवाद या निकालात निर्णायक ठरला. १६ सप्टेंबर २०१३ नेवासा तहसील कार्यालयाचा परिसरात भरदिवसा बंदुकीच्या गोळ्यांचा थरार! अॅड. रियाज पठाण यांच्यावर आरोपी प्रवीण खर्चन याने पिस्तुलातून सलग तीन गोळ्या झाडल्या. त्यावेळी त्याच्या साथीदारांनी पठाण यांचे हात पकडून ठेवल्याचे प्रत्यक्षदर्शी साक्षीतून समोर आले. या हल्ल्याने नेवासा तालुक्यासह संपूर्ण अहिल्यानगर जिल्ह्यात खळबळ उडाली होती. गोळीबारानंतर गंभीर जखमी अवस्थेत अॅड. पठाण यांना उपचारासाठी नेवासा येथून अहिल्यानगरमधील नोबेल हॉस्पिटलमध्ये हलविण्यात आले. मात्र, उपचार सुरू होण्यापूर्वीच त्यांना मृत घोषित करण्यात आले. घटनेनंतर पोलिसांनी मुख्य आरोपी प्रवीण खर्चन याला पिस्तुलासह ताब्यात घेतले. एका साक्षीचा गैरसमज आणि आखला हत्येचा कट एका खून खटल्यात अॅड. रियाज पठाण यांनी साक्ष दिल्याच्या गैरसमजातून आरोपींनी त्यांच्या हत्येचा कट रचल्याचा आरोप सरकारी पक्षाने ठेवला होता. नेवासा पोलिसांनी या प्रकरणात एकूण १२ आरोपींविरुद्ध दोषारोपपत्र दाखल केले.खटल्यादरम्यान सरकार पक्षाने तब्बल २९ साक्षीदार तपासले.प्रत्यक्षदर्शी साक्ष, वैद्यकीय अहवाल, शवविच्छेदन अहवाल आणि फॉरेन्सिक पुरावे यांच्या आधारे न्यायालयाने सात आरोपी दोषी ठरवले. निकमांचा युक्तिवाद; आरोपींचे बचावाचे दावे फोल मुख्य आरोपी प्रवीण खर्चन याने घटनेच्या वेळी आपण अज्ञान अर्थात नाबालिक असल्याचा दावा करून खटला चालविण्यास विरोध करण्याचा प्रयत्न केला. मात्र, विशेष सरकारी वकील अॅड. उज्ज्वल निकम यांनी हा दावा सप्रमाण खोडून काढत आरोपी सज्ञान असल्याचे न्यायालयासमोर सिद्ध केले. मोहन लष्करे आणि सादिक शेख यांनी घटनेच्या वेळी आपण नेवासा फाटा येथे असल्याचा दावा केला होता. मात्र, उलटतपासणीत त्यांचा हा दावा टिकला नाही. आरोपींच्या बचावाकडून पठाण गँग आणि गाढे गँगमधील वैमनस्यातून ही हत्या झाली असा युक्तिवाद करण्यात आला मात्र सरकारी पक्षाने हा दावाही पुराव्यांच्या आधारे खोडून काढला. अॅड. उज्ज्वल निकम यांनी न्यायालयात केवळ दोषींविरोधातील भक्कम पुराव्यांवरच भर दिला नाही, तर ज्या पाच आरोपींविरोधात कटातील सहभागाचा प्रत्यक्ष व ठोस पुरावा उपलब्ध नाही, त्यांना निर्दोष सोडण्याची भूमिकाही स्पष्टपणे मांडली. न्यायालयाने ही बाब ग्राह्य धरत पाच आरोपींची निर्दोष मुक्तता केली. न्यायालयाने प्रवीण खर्चन, मोहन लष्करे, रामेश्वर गाढे, चौरंगीनाथ लष्करे, पवन नरुल्ला, सचिन चव्हाण आणि सादिक बशीर शेख या सात आरोपींना मरेपर्यंत जन्मठेप आणि दंडाची शिक्षा सुनावली. तर अशोक जगताप, सत्यवान सोनकांबळे, विलास जिरे, सोपान गाढे आणि सुनील ऊर्फ सोन्या परदेशी यांची सबळ पुराव्याअभावी निर्दोष मुक्तता करण्यात आली.१७ नोव्हेंबर २०१८ पासून सुरू असलेल्या या प्रदीर्घ खटल्याच्या सुनावणीला अखेर न्यायालयीन पूर्णविराम मिळाला आहे. तब्बल १३ वर्षांपूर्वी तहसील कार्यालयाच्या आवारात झालेल्या त्या थरारक हत्येचा निकाल लागल्याने पठाण कुटुंबीयांसह नेवासा परिसराचे या निकालाकडे लक्ष लागले होते. सरकारी पक्षाच्या वतीने विशेष सरकारी वकील अॅड. उज्ज्वल निकम यांनी प्रभावी युक्तिवाद केला. त्यांना अॅड. परिमल फळे यांनी सहाय्य केले.

Ahilyanagar Crime: तहसील कार्यालयात गोळ्यांचा थरार; अॅड. रियाज पठाण हत्या प्रकरणात 7 जणांना मरेपर्यंत जन्मठेप Read More »

EPFO Rules : PF काढण्याची घाई करू नका; 36 महिन्यांपर्यंत थांबल्यास काय फायदा होऊ शकतो? जाणून घ्या नवे नियम

Leave a Comment / ऑटोमोबाईल, ट्रेंडिंग, ताज्या बातम्या, हायलाईट / dnamarathi.com

EPFO Rules : नोकरी करणाऱ्या लाखो कर्मचाऱ्यांसाठी PF म्हणजेच कर्मचारी भविष्य निर्वाह निधी हा भविष्यातील आर्थिक आधार असतो. दर महिन्याला पगारातून काही रक्कम PF खात्यात जमा होते आणि त्यावर व्याजही मिळते. त्यामुळे नोकरी सोडल्यानंतर लगेच PF मधील संपूर्ण रक्कम काढण्याऐवजी ती काही काळ तशीच ठेवणे फायदेशीर ठरू शकते. मात्र, सध्या PF आणि पेन्शनशी संबंधित नियमांमध्ये काही महत्त्वाचे बदल करण्यात आले आहेत. विशेषतः नोकरी सोडल्यानंतर PF आणि EPS मधील रक्कम काढण्याच्या कालावधीत बदल करण्यात आला आहे. त्यामुळे कर्मचाऱ्यांनी EPF आणि EPS यातील फरक समजून घेणे महत्त्वाचे आहे. नोकरी सोडल्यानंतर लगेच संपूर्ण PF काढता येणार नाही नव्या नियमांनुसार, नोकरी सोडल्यानंतर संपूर्ण EPF रक्कम काढण्यासाठी पूर्वीच्या तुलनेत जास्त काळ प्रतीक्षा करावी लागणार आहे. पूर्वी नोकरी सोडल्यानंतर दोन महिने बेरोजगार राहिल्यानंतर अंतिम PF सेटलमेंट करता येत होते. आता हा कालावधी 12 महिने करण्यात आला आहे. म्हणजेच एखाद्या कर्मचाऱ्याने नोकरी सोडली आणि त्यानंतर लगेच दुसरी नोकरी मिळाली नाही, तरी त्याला संपूर्ण PF रक्कम तातडीने काढता येणार नाही. मात्र, नियमांनुसार काही विशिष्ट कारणांसाठी आंशिक PF काढण्याची सुविधा उपलब्ध राहते. मग 36 महिन्यांचा नियम नेमका कशासाठी? येथे सर्वात महत्त्वाची गोष्ट म्हणजे 36 महिन्यांचा नियम EPF आणि EPS दोन्हीसाठी सारखा नाही. कर्मचारी पेन्शन योजना म्हणजेच EPS मधील withdrawal benefit मिळवण्यासाठी प्रतीक्षा कालावधी 36 महिने करण्यात आला आहे. यामागचा उद्देश कर्मचारी आपली पेन्शनची बचत लगेच काढून टाकू नयेत आणि दीर्घकाळासाठी सामाजिक सुरक्षा व पेन्शनचा आधार टिकवून ठेवावा हा आहे. त्यामुळे “PF काढण्यासाठी 36 महिने थांबावे लागेल” असे सरसकट म्हणणे अचूक नाही. पूर्ण EPF काढण्याचा कालावधी 12 महिने, तर EPS withdrawal benefit साठी 36 महिने असा फरक समजून घेणे गरजेचे आहे. PF लगेच न काढल्यास काय फायदा? PF मधील रक्कम न काढता खात्यात ठेवली तर ती दीर्घकाळासाठी बचत म्हणून काम करू शकते. त्यावर लागू असलेल्या नियमांनुसार व्याज मिळत राहू शकते आणि त्यामुळे भविष्यातील निधी वाढू शकतो. उदाहरणार्थ, एखाद्या कर्मचाऱ्याच्या PF खात्यात आधीच मोठी रक्कम जमा असेल आणि त्याला पैशांची तातडीची गरज नसेल, तर ती रक्कम लगेच काढण्याऐवजी निवृत्तीपर्यंत किंवा पुढील नोकरीत PF खाते ट्रान्सफर करून ठेवणे अधिक फायदेशीर ठरू शकते. यामुळे निवृत्तीच्या काळासाठी मोठा निधी तयार करण्यास मदत होते. नोकरी बदलली असेल तर PF काढण्याऐवजी ट्रान्सफर करणे चांगले एखाद्या कर्मचाऱ्याने एक कंपनी सोडून दुसऱ्या कंपनीत नोकरी स्वीकारली असेल, तर PF काढण्याऐवजी जुना PF नवीन नियोक्त्याच्या खात्यात ट्रान्सफर करणे सामान्यतः अधिक योग्य पर्याय ठरतो. PF ट्रान्सफर केल्यामुळे जुनी बचत कायम राहते आणि पुढील नोकरीदरम्यान त्यात नवीन योगदान जमा होत राहते. यामुळे निवृत्तीच्या वेळी मिळणारा एकूण निधी वाढण्यास मदत होते. PF खात्यात पैसे ठेवले तर व्याज मिळते का? या बाबतीतही एक महत्त्वाचा फरक आहे. फक्त नोकरी सोडली म्हणून PF खाते लगेच बंद किंवा निष्क्रिय होत नाही. मात्र काही परिस्थितींमध्ये खाते inoperative होऊ शकते. EPFOच्या माहितीनुसार, काही निष्क्रिय खात्यांमध्ये व्याज मिळणे थांबू शकते. त्यामुळे जुने PF खाते असल्यास त्याची स्थिती तपासणे आणि आवश्यक असल्यास रक्कम योग्य खात्यात ट्रान्सफर करणे महत्त्वाचे आहे. 36 महिने म्हणजे तीन वर्षे 36 महिने म्हणजे साधारण तीन वर्षे मात्र हा कालावधी पाहताना EPF आणि EPS वेगळे समजणे आवश्यक आहे. EPS मधील withdrawal benefit साठी 36 महिन्यांचा प्रतीक्षा कालावधी आहे. दुसरीकडे, EPFच्या अंतिम सेटलमेंटसाठी बेरोजगारीनंतर 12 महिन्यांचा कालावधी लागू आहे. सरकारचा उद्देश काय? नव्या नियमांमागचा मुख्य उद्देश कर्मचाऱ्यांना दीर्घकालीन आर्थिक सुरक्षा देणे हा आहे. नोकरी गेल्यानंतर मिळालेली PFची संपूर्ण रक्कम लगेच खर्च करण्याऐवजी ती भविष्यासाठी सुरक्षित राहावी, तसेच पेन्शनशी संबंधित लाभ कायम राहावेत, यासाठी नियमांमध्ये बदल करण्यात आले आहेत. विशेषतः EPS मधील रक्कम लवकर काढून टाकल्यास कर्मचाऱ्याच्या भविष्यातील पेन्शन सुरक्षेवर परिणाम होऊ शकतो. त्यामुळे सरकारने withdrawal benefit साठी प्रतीक्षा कालावधी वाढवला आहे. कर्मचाऱ्यांनी काय लक्षात ठेवावे? नोकरी सोडल्यावर संपूर्ण PF लगेच काढण्याची घाई करू नका. नवीन नोकरी मिळाल्यास जुना PF नवीन खात्यात ट्रान्सफर करण्याचा पर्याय विचारात घ्या. EPF आणि EPS हे वेगवेगळे घटक आहेत; दोन्हींचे withdrawal नियम एकसारखे नाहीत. EPFच्या अंतिम सेटलमेंटसाठी सध्याच्या नियमांनुसार 12 महिन्यांचा प्रतीक्षा कालावधी लागू आहे. EPS withdrawal benefit साठी 36 महिन्यांचा प्रतीक्षा कालावधी आहे. जुन्या किंवा निष्क्रिय PF खात्याची स्थिती तपासा. तातडीची आर्थिक गरज नसल्यास PFची रक्कम दीर्घकाळ बचत म्हणून ठेवणे निवृत्तीसाठी फायदेशीर ठरू शकते.

EPFO Rules : PF काढण्याची घाई करू नका; 36 महिन्यांपर्यंत थांबल्यास काय फायदा होऊ शकतो? जाणून घ्या नवे नियम Read More »