Kathua Encounter : कठुआमध्ये सुरू असलेल्या चकमकीत CRPF चा एक जवान शहीद झाला असल्याची माहिती समोर आली आहे. कबीर दास असे या शहीद जवानाचे नाव आहे.
मंगळवारी सायंकाळी उशिरा सुरू झालेली चकमक अजूनही सुरूच असल्याचे सांगण्यात येत आहे. भारतीय सुरक्षा दलांनी दोन दहशतवाद्यांना घेरले आहे. या चकमकीत एक पाकिस्तानी दहशतवादी यापूर्वीच ठार झाला आहे. कठुआ हिरानगरच्या सोहल गावात झालेल्या या चकमकीत एक नागरिकही जखमी झाला आहे. त्याच्यावर उपचार सुरू आहेत.
पंजाब जम्मू सीमा सील
कठुआ ऑपरेशन लक्षात घेऊन भारतीय लष्कराने जम्मू पठाणकोट सीमा रस्त्याचा ताबा घेतला आहे. यावेळी प्रत्येक वाहनाची तपासणी करून पुढे जाण्याची परवानगी दिली जात आहे. सध्या जम्मू भागात सर्व प्रकारे हाय अलर्ट ठेवण्यात आला आहे. पोलिसांनी सांगितले की, सुरक्षा दलांनी एका संशयित पाकिस्तानी दहशतवाद्याचा खात्मा केला आहे.
दोडामध्ये पाच जवान जखमी, जैशने घेतली जबाबदारी
दहशतवादी संघटना जैश-ए-मोहम्मदची आघाडी असलेल्या काश्मीर टायगर्सने डोडा हल्ल्याची जबाबदारी स्वीकारली आहे. ही दहशतवादी संघटना अनेक वर्षांपासून निष्क्रिय होती. अचानक याने दोडामध्ये सक्रियता दाखवली आहे. सध्या दोडामध्ये चकमक सुरू आहे. सुरक्षा दलाचे पाच जवान आणि एक एसपीओ जखमी झाले आहे.