Champions Trophy Final: आयसीसी चॅम्पियन ट्रॉफीच्या फायनलमध्ये भारतीय संघाने न्यूझीलंडचा 4 विकेट्सने पराभव करत चॅम्पियन ट्रॉफी 2025 चे विजेतेपद जिंकले आहे. मात्र या स्पर्धेच्या सुरवातीपासून जबरदस्त फॉर्मात असलेल्या न्यूझीलंड संघाला फायनलमध्ये पाच चुका भारी पडल्या ज्यामुळे त्यांना अंतिम सामन्यात भारताकडून पराभव पत्करावा लागला.
मॅट हेन्री अंतिम सामन्यातून बाहेर
न्यूझीलंडच्या आशांना सर्वात मोठा धक्का सामन्यापूर्वीच बसला कारण या स्पर्धेत सर्वाधिक 10 बळी घेणारा वेगवान गोलंदाज मॅट हेन्री दुखापतीमुळे अंतिम सामना खेळू शकला नाही. त्याच्या जागी खेळणाऱ्या नाथन स्मिथने 2 षटकांत 22 धावा दिल्या.
फिरकी गोलंदाजी खेळता आली नाही
या सामन्यात प्रथम फलंदाजी करताना न्यूझीलंडच्या फलंदाजांनी भारतीय वेगवान गोलदाजांवर हल्लाबोल केला मात्र त्यानंतर फिरकी गोलंदाजी सुरू होताच विकेट पडू लागल्या. पहिल्या 75 धावांमध्ये, फॉर्ममध्ये असलेले तिन्ही फलंदाज यंग, रॅचिन आणि विल्यमसन फिरकीच्या जाळ्याचे बळी पडले.
मधल्या षटकांच्या फलंदाजी स्लो
मधल्या षटकांच्या टप्प्यात किवी फलंदाजांना एकेरी आणि दुहेरी धावा करता आल्या नाहीत. डॅरिल मिशेलने 63 धावा केल्या असतील, पण त्यासाठी त्याला 101 चेंडू लागले. अशा परिस्थितीत, धावगती बरीच कमी झाली आणि त्यानंतर, न्यूझीलंडला मोठी धावसंख्या उभारता आली नाही.
वेगवान गोलंदाजी निराशाजनक कामगिरी
जेव्हा किवी गोलंदाज गोलंदाजी करायला आले तेव्हा रोहित शर्माने त्यांच्यावर वर्चस्व गाजवले आणि त्यांना बॅकफूटवर नेले. त्यानंतर वेगवान गोलंदाजांना विकेट घेण्यात अपयश आले आणि पहिल्या 10 षटकांत त्यांनी भरपूर धावा दिल्या. त्यामुळे 252 चा स्कोअर आणखी कमी झाला.
श्रेयस अय्यरचा महत्त्वाचा झेल सोडला
एकेकाळी लक्ष्याचा पाठलाग करताना टीम इंडिया अडचणीत सापडल्याचे दिसत होते, परंतु श्रेयस अय्यरने शानदार पुनरागमन केले. त्यानंतर, जेव्हा भारताला जिंकण्यासाठी 100 पेक्षा जास्त धावांची आवश्यकता होती, तेव्हा 44 धावांवर अय्यरचा सोपा झेल सोडला. त्यानंतर गती भारताकडे सरकली आणि किवींचे खांदे झुकले.