Mumbai Police : पुन्हा एकदा राज्याची राजधानी मुंबईमध्ये दहशत निर्माण करणारा मेसेज आला आहे. समोर आलेल्या माहितीनुसार एका अज्ञात व्यक्तीने मुंबई शहरात सहा बॉम्ब ठेवल्याचा दावा केला आहे.
या धमकीच्या मेसेजनंतर पोलीस विभाग अलर्ट मोडमध्ये आला आहे. अधिकाऱ्यांनी सांगितले की, मुंबई वाहतूक पोलिस नियंत्रण कक्षाला मुंबईतील स्फोटाशी संबंधित मेसेज प्राप्त झाला आहे.
मिळालेल्या माहितीनुसार, एका अज्ञात व्यक्तीने मुंबई वाहतूक पोलीस नियंत्रण कक्षाला धमकीचा मेसेज पाठवला आहे. मुंबईत सहा ठिकाणी बॉम्ब ठेवण्यात आले असून मोठा स्फोट होणार असल्याचा दावा संशयिताने केला आहे. वाहतूक पोलिसांनी तत्काळ मुंबई पोलिसांच्या वरिष्ठ अधिकाऱ्यांना याची माहिती दिली.
तर दुसरीकडे या धमकीमुळे पोलीस यंत्रणा सतर्क झाली आहे. मुंबई पोलिसांशिवाय इतर सुरक्षा यंत्रणाही सतर्क झाल्या आहेत. अज्ञात आरोपींविरुद्ध आयपीसीच्या संबंधित कलमांतर्गत गुन्हा दाखल करण्यात आला असून तपास सुरू आहे.
मुंबई वाहतूक पोलिसांच्या हेल्पलाइन क्रमांकावरून व्हॉट्सॲपवर धमकीचा मेसेज आल्याचे सांगण्यात येत आहे. यानंतर खबरदारी म्हणून मुंबई पोलिसांनीही काही महत्त्वाच्या ठिकाणी तपासणी केली, मात्र कुठेही काहीही आढळून आले नाही.
धमकी देणाऱ्या अज्ञात व्यक्तीविरुद्ध गुन्हा दाखल करण्यात आला असून त्याचा शोध सुरू आहे. गेल्या काही महिन्यांत मुंबईत धमकीचे कॉल, मेसेज आणि ईमेल येण्याच्या घटनांमध्ये लक्षणीय वाढ झाली आहे.
बुधवारीही असाच धमकीचा मेसेज आला होता. पोलीस तपासात हा मेसेज बनावट असल्याचे सिद्ध झाले. याआधी रिझर्व्ह बँक ऑफ इंडिया (RBI) आणि शहरातील अनेक मोठ्या बँकांना बॉम्बने उडवण्याची आणि मुंबई लोकल ट्रेनमध्ये बॉम्बस्फोट घडवून आणण्याच्या धमक्याही देण्यात आल्या होत्या.
काही प्रकरणांमध्ये आरोपीला काही तासांतच अटक करून तुरुंगात पाठवण्यात आले.