Spain vs France : स्पेनचा दमदार विजय; फ्रान्सला पराभूत करत विश्वचषकाच्या अंतिम फेरीत प्रवेश
Spain vs France : फिफा विश्वचषक 2026 च्या पहिल्या उपांत्य फेरीत स्पेनने सर्वांना धक्का देत फ्रान्सवर 2-0 असा दणदणीत विजय मिळवत अंतिम फेरीत धडक मारली. अमेरिकेतील आर्लिंग्टन येथे झालेल्या या सामन्यात स्पेनने सुरुवातीपासूनच आक्रमक खेळ करत फ्रान्सच्या बलाढ्य संघाला पराभव केले. या विजयासह स्पेनने विश्वचषक जिंकण्याच्या दिशेने आणखी एक महत्त्वाचे पाऊल टाकले आहे. सामन्याच्या 22 व्या मिनिटाला मिकेल ओयारझाबाल याने पेनल्टीवर गोल करत स्पेनला 1-0 अशी आघाडी मिळवून दिली. युवा स्टार लामिन यामाल याच्यावर झालेल्या फाऊलमुळे स्पेनला ही पेनल्टी मिळाली. त्यानंतर 58 व्या मिनिटाला पेद्रो पोरो याने अप्रतिम गोल करत स्पेनची आघाडी 2-0 अशी भक्कम केली. फ्रान्सकडे किलियन एम्बाप्पे, उस्मान डेंबेले आणि मायकेल ओलिसे यांसारखे आक्रमक खेळाडू असूनही स्पेनच्या भक्कम बचावफळीसमोर त्यांना गोल करण्यात अपयश आले. या स्पर्धेत स्पेनची बचावफळी सात सामन्यांपैकी सहा सामन्यांत अभेद्य राहिली असून, संपूर्ण स्पर्धेत त्यांनी केवळ एकच गोल स्वीकारला आहे. प्रशिक्षकांच्या अचूक रणनीती आणि युवा खेळाडूंच्या दमदार कामगिरीमुळे स्पेनने अंतिम फेरीत स्थान निश्चित केले आहे. आता अंतिम फेरीत स्पेनचा सामना इंग्लंड आणि अर्जेंटिना यांच्यातील दुसऱ्या उपांत्य फेरीतील विजेत्याशी होणार आहे. दुसरीकडे, फ्रान्सला आता तिसऱ्या स्थानासाठीचा सामना खेळावा लागणार आहे.