Madh Island : मुंबईत कॉलेज पार्टीत धक्कादायक प्रकार! गुंगीचे औषध देऊन विद्यार्थिनीवर अत्याचार; छत्तीसगडमधून आरोपीला अटक
Madh Island : मुंबईतील मढ आयलंड परिसरात कॉलेजच्या विद्यार्थ्यांनी आयोजित केलेल्या पार्टीदरम्यान एका विद्यार्थिनीवर लैंगिक अत्याचार झाल्याची धक्कादायक घटना समोर आली आहे. पार्टीमध्ये विद्यार्थिनीच्या पेयात गुंगी आणणारे औषध मिसळून तिला बेशुद्ध केल्यानंतर तिच्यावर अत्याचार केल्याचा आरोप तिच्याच कॉलेजमधील एका विद्यार्थ्यावर आहे. या प्रकरणी मुंबई पोलिसांनी छत्तीसगडमधून 22 वर्षीय आरोपीला अटक केली आहे. या घटनेमुळे मुंबईतील महाविद्यालयीन तरुणांच्या सुरक्षिततेचा प्रश्न पुन्हा ऐरणीवर आला आहे. नेमकी घटना काय? मिळालेल्या माहितीनुसार, मुंबईतील विलेपार्ले येथील एका महाविद्यालयातील काही विद्यार्थ्यांनी 29 ऑक्टोबर रोजी मालाड पश्चिमेकडील मढ आयलंड परिसरात पार्टीचे आयोजन केले होते. या पार्टीला संबंधित विद्यार्थिनी आणि तिचे काही मित्रही उपस्थित होते. पार्टी सुरू असताना आरोपीने विद्यार्थिनीच्या पेयात गुंगी आणणारे औषध मिसळल्याचा आरोप आहे. हे पेय प्यायल्यानंतर विद्यार्थिनीची शुद्ध हरपली. त्यानंतर तिच्या असहाय्य अवस्थेचा फायदा घेत आरोपीने तिच्यावर लैंगिक अत्याचार केल्याचे पोलिसांच्या प्राथमिक तपासात समोर आले आहे. पालकांना सांगितली आपबिती; पोलिसांत तक्रार घटनेनंतर विद्यार्थिनी शुद्धीवर आल्यानंतर घरी परतली. त्यानंतर तिने घडलेला संपूर्ण प्रकार आपल्या पालकांना सांगितला. मुलीची आपबिती ऐकल्यानंतर पालकांनी तिला सोबत घेऊन जुहू पोलीस ठाणे गाठले आणि तक्रार दाखल केली. नोव्हेंबर महिन्याच्या पहिल्या आठवड्यात पोलिसांनी विद्यार्थिनीचा जबाब नोंदवून घेतला. त्यानंतर या प्रकरणाची गंभीर दखल घेत गुन्हा दाखल करण्यात आला. गुन्हा दाखल होताच आरोपी छत्तीसगडला पसार या प्रकरणात गुन्हा दाखल झाल्याची माहिती मिळताच आरोपी मुंबई सोडून आपल्या मूळ गावी छत्तीसगड येथे गेल्याचे पोलिसांच्या तपासात निष्पन्न झाले. यानंतर जुहू पोलिसांनी आरोपीचा शोध घेण्यासाठी विशेष पथक छत्तीसगडला पाठवले. पोलिसांनी तेथे कारवाई करून 22 वर्षीय आरोपीला ताब्यात घेतले. स्थानिक न्यायालयातून ट्रान्झिट रिमांड मिळवल्यानंतर त्याला मुंबईत आणण्यात आले. मुंबईतील न्यायालयात हजर केले असता आरोपीला पोलीस कोठडी सुनावण्यात आली. भारतीय न्याय संहितेअंतर्गत गुन्हा दाखल या प्रकरणी भारतीय न्याय संहितेच्या (BNS) कलम 64(1), 74, 123 आणि 3(5) अंतर्गत गुन्हा दाखल करण्यात आला आहे. आणखी एका संशयिताची भूमिका तपासात या प्रकरणात आणखी एका संशयिताचे नाव एफआयआरमध्ये समोर आले आहे. मात्र, कथित लैंगिक अत्याचारामध्ये त्याचा नेमका सहभाग होता का, हे अद्याप स्पष्ट झालेले नाही. पोलिसांकडून त्याच्या भूमिकेची चौकशी सुरू आहे. पार्टीमध्ये उपस्थित असलेल्या इतर विद्यार्थ्यांचे जबाबही नोंदवण्यात येत असून, पार्टीच्या ठिकाणचे सीसीटीव्ही फुटेज आणि इतर पुरावे तपासले जात आहेत. महाविद्यालयीन विद्यार्थ्यांच्या सुरक्षिततेचा प्रश्न ऐरणीवर या घटनेमुळे महाविद्यालयीन विद्यार्थ्यांच्या पार्टी, मित्रपरिवारातील कार्यक्रम आणि सार्वजनिक ठिकाणी होणाऱ्या समारंभांमधील सुरक्षिततेचा प्रश्न पुन्हा चर्चेत आला आहे.
